唔知大家重記唔記得「快閃黨」呢個喺早排都流行過吓嘅玩意呢？快閃黨喺香港的確係黨如其名，都未普及就快快閃咗。八方噚日有機會再見番呢個沉寂一時嘅玩意。話說有班電單車愛好者，眼見今年偷電單車案不斷上升，而警察破案率又出奇咁低，車主們於是搞咗個快閃活動作抗議，三十幾人一齊喺中環皇后碼頭戴好個電單車頭盔、拉橫額，宣讀聲明叫大家關注吓偷電單車呢個問題，前前後後搞咗成十分鐘，閃得唔係好快。
車主林先生舊年俾人偷咗架寶馬電單車，要買番架新車，一來一回唔見咗成十幾萬銀。另一車主楊先生話，唔少參加者都唔敢揸電單車嚟，免得部靚車會俾賊佬「點相」，到時部車就真喺會「快閃」。
（圖）三十幾名電單車發燒友一齊喺中環皇后碼頭外戴起頭盔拉開橫額扮快閃黨，呼籲大家注意偷電單車問題。
區民傑攝
傳真︰2623-9278
電郵︰