香港人鍾意睇明星，發展商賣樓好多時都會暗地裏搵啲名人明星嚟撐吓場博見報，估唔到來港銷售的內地樓盤都用上呢招。深圳百仕達花園最新一期百仕達．東郡，喺紅磡都會軒商場的展銷廳噚日開幕，其間前港姐寇鴻萍、歌星莫文蔚媽咪莫何敏儀同孫光華一行三人到場睇樓。
三個名女人着得雍容華貴，儀態萬千咁四圍參觀，聽講佢哋睇好百仕達．東郡嘅租金回報，想掃番幾間作長線投資。三人雖然逗留唔夠十五分鐘就走咗，不過噚日係星期日，悉心打扮專程出嚟睇樓，都好難得。
另外，參觀百仕達．東郡，可以參加一按即獎嘅遊戲，只要揀中一組預設嘅7位數字，就可以得到價值一百萬嘅單位一個，名額兩個，總值二百萬。呢個玩法熟口熟面，因為香港某大豪宅樓盤都試過。
元朗加州花園喺日本腦炎陰影下，錄得一宗低價成交，美聯張子存話，業主心理上或多或少受到影響，傾價容易咗，好似剛賣出嘅水仙徑單號屋，二零二一呎，最初叫價六百二十萬，日本腦炎爆發後，業主願意減價八個巴仙，以五百六十八萬成交，呎價二千八百幾，低市價一成。個買家睇樓睇咗好耐，早前嫌貴唔買，今次趁壞消息翻睇，真係俾佢執到筍貨。
日本腦炎引起全城高度戒備，美聯物業已向集團所有員工發出防蚊患指引，包括適當地棄置盛水容器、清潔分行附近積水，同避免在分行範圍內堆放雜物。
而不少分行，特別係高危地區分行同事，都有向總行滙報情況，由公司或政府衞生部門協助解決問題。
美聯咁做，目的自然係想令業主買家安心幫襯，否則分行員工除咗成日拍「蚊」之外，重要拍埋「烏蠅」㖭。
早前有報道指出，太古地產在灣仔皇后大道東的太古廣場三期，會建隧道連接一、二期，同美化附近環境，一名就投資者，以九十三萬，購入附近星街星月閣中層D室，面積三百五十呎。
中原分區經理黃文龍表示，該投資者預計單位能吸引行政人員租住，月租可達六千元，回報有七厘七。佢透露，買家原來住喺星街，對區內市況好熟悉，所以即睇即買，唔使三個鐘就扑槌。
上個月底，政府拍賣馬鞍山住宅地皮，以貴過「麵包價」好多的價格成交，市場即時以為同區二手樓市前景秀麗，點知原來係「一廂情願」的想法，最近有區內業主因感市況唔係預期咁熱烈，五度減價沽貨離場。
中原高級分行經理余志文指出，單位為曉峰灣畔中層，面積八一八呎，原業主五月賣地前叫價二百四十萬，點知樓市未因賣地成績而造好，單位遲遲不見承接，在五度降價後先搵到買家，成交價二零一萬，蝕五萬離場。
單位呎價二四五七元，較拍賣的馬鞍山地皮樓面呎價二七七三元低逾一成。不過，中原就好樂觀咁話，由此反映同區樓價落後大市。
蘭西
電郵地址：
