五窮六絕七翻身。過多3日，踏入7月，港股經過先幾個月冧檔之後，估計漸入佳境，不利因素，諸如美國預期加息、國內宏調等，市場已經習慣咗，影響告一段落，股民又再熱衷搵銀。
和黃（013）有消息獲准分拆HTIL上市，近期走勢反覆靠穩。3G前景，大行睇法亦冇咁悲觀。和黃Call輪可以搵啲嚟炒吓，對象係9780同9833。9780喺10月到期，輪價25仙，溢價10.6%，槓桿率20.8倍。9833亦係10月到期，輪價38仙，溢價7.3%，槓桿率13.7倍。搏殺格係9780，唔想畀較高溢價則揀槓桿率較細嘅9833。
電訊股係重磅貨，大市好，中移動（941）亦多數有份，Call輪值得吼吓，對象係9769同9824。9769喺10月夠鐘，輪價16.1仙，溢價9.2%，槓桿率14.5倍。9824喺9月底到期，輪價22.5仙，溢價5.6%，槓桿率10.4倍。正股上周五升10仙，9824行先一步，升9.2%；9769升得慢啲，升3.9%。
上周五收市時，平保（2318）牌下有奇景，10.30元買家總買盤1.02億股，大部份係高盛，高盛係平保上市環球聯席協調人，擺明維持秩序。如果要質晒佢，成交會即刻多兩倍（是日成交不過52.8球）。平保收市雖低過10.33元招股價，只係電腦判斷收市價，實情10.35元收。估計平保唔會太潛水，相對PE較低嘅國壽（2628），應睇得吓，可諗吓國壽Call輪短炒，主角9822，9月到期，輪價38.5仙，溢價9.2%，槓桿率11.6倍。
章盛