潮流興打高爾夫球，唔識打波，喺高官同埋富商小圈子，會俾人譏笑為似一個農民，所以保安局局長李少光，趁周末做獨行俠去馬鞍山白石高爾夫球場秘密操練。短打一襲連保鑣都冇，喺球道處，耷低個頭揮桿狂砌，眼力稍差者都認唔到呢位本港紀律部隊最高領導人。
據高球老友畀貼士八方，李局長球技不俗，支球棍揸得好硬淨，十分堅挺，估計落場一百桿，絕冇走雞。呢一版嘅讀者，好多係高官，第日同李少光落場，千祈咪低估局長球技，否則就會被佢「揼雞」得米。
另外，據官場老友透露，李局長打高球甚為低調，絕少與友人同行，佢之所以鍾意靜雞雞一支公去練波，除咗當做運動外，最大目的係發洩、減壓兼度橋。據知，局長今日將出席立法會保安事務委員會，就內地公安疑越境秘密來港執法一案解畫，如此震撼性嘅問題，唔怪得要去打波減壓先，諗計仔今日向眾議員交代。
傳真︰2623-9278
電郵︰
