雖然倫敦前日天陰有雨，但冇影響到當地傳奧運聖火嘅盛事，當日《我愛碧咸》女主角柏美達娜拉（ParminderNagra）就有份傳聖火，之後喺倫敦亦舉行咗個群星演唱會，其中洛史釗活（RodStewart）個女友PennyLancaster着住條迷你裙表演，極為搶鏡。
據悉原來自一九四八年之後，奧運聖火已經冇經過倫敦，難得今年嘅雅典奧運，把聖火傳到嚟倫敦，大會自然隆重其事，唔止安排咗當地嘅奧運得獎選手傳聖火，連憑《我愛碧咸》而深入民心嘅印度女演員柏美達亦有份參與傳聖火。
之後喺倫敦舉行嘅慶祝演唱會亦非常墟冚，當日大約有成七萬人迫去睇騷。身穿性感迷你裙嘅PennyLancaster準備出場表演嗰陣，喺佢身旁嘅男友洛史釗活，公然昅佢女友個美臀，認真百厭。
不過，當洛叔同RonnieWood同台表演嗰陣，又唱得鬼死咁投入認真，重博得觀眾熱烈掌聲。至於新紮R&B女歌手Jamelia，以性感長裙表演，亦令觀眾眼前一亮。