中國國家副主席曾慶紅繼續推出優惠大行動，反中亂港兼港獨親美英分子，只要留意中方嘴形，兼剪存印花，就快可以成功換領到回鄉證一張。
為表誠意，頭炮優惠，頒發畀六四反革命暴亂時期顛覆組織「黃雀行動」核心人物「雷勁」。講起呢個雷某，英雄事迹可謂一匹布咁長，佢早年學周恩來咁去法國勤工儉學，重係前蘇聯托洛斯基派東亞學術分部「革馬盟」活躍人物。共黨最憎就係所謂「托派」，因為蘇共嘅史太林，正如雍正暗殺康熙，係竊取列寧嘅繼承權奪位，成功之後，就派殺手用斧頭將托洛斯基監生劈死。
大陸毛伯伯係史太林個黃面佬契弟，史太林追殺托洛斯基，毛契弟就梗係跟尾圍剿托派。佢有咁花嘅底，跟住重衰埋「黃雀行動」，同本地江湖俠義界人士協助吾爾開希、柴玲等偷渡，重帶咗一大批港人嘅善款上天安門廣場，咁多鑊串燒埋，大陸只係吊銷回鄉證，唔放長線引佢北上之後將佢逮捕再明正典刑，共黨已經係十分之慈悲嘞。
「雷勁」咁十惡不赦，都有回鄉證攞，咁兩代反共嘅李柱銘、卿姐、司徒華，又算得乜嘢，睇嚟好快亦會嚟料中獎。至於其他重有一批死得不明不白嘅外圍人士，例如唔知點解上去又冇叫雞，只係參加咗一次荔枝團落嚟跟住又沒收埋回鄉證嘅肥仔明，同埋喺大陸被判監四年、因英國首相馬仔安干預內政獲得釋放嘅羅海星，照咁睇不但好快會有證，而且重會獲得國家正式簽發嘅平反證書一張，話唔定每人重會獲三千元人民幣嘅賠償㖭。
當然，國家發放回鄉證，係好循序漸進嘅，有啲先有啲後，千祈唔好打尖爭先恐後。「雷勁」等人重有一樣要記住，就係國家雖然發證，但身為前罪犯，亦要遵守中旅社定嘅申證規則，交手續費，繳交兩張半身相（記住背景要係指定粉紅色牆紙嗰隻，而唔係領英國護照半身相所要求嘅白色，國家同美英帝國主義始終係勢不兩立嘅）。
同時，上到中旅社換證嗰陣，態度亦唔可以咁囂張，若然遇到櫃枱嘅女職員貌似蔡素玉、講嘢有福建口音，唔好拍枱拍窗、提高對話聲浪、蓄意加以歧視，並指住自己個鼻問「你知唔知我係邊個」，而係老老實實領籌、排隊、填表、交錢、交相，然後坐埋一邊等嗌冧巴，最好一路等，一路眼濕濕咁，作對祖國無限眷戀狀，故意讓現場食Q攝錄機拍攝晒成個過程，國家就會更加滿意，進一步統戰溝通有望，話唔定點止有回鄉證，好快重可以三級跳，直入人民大會堂，同到時黑口黑面嘅鄔維庸、劉迺強等坐一圍枱，另外重有司徒華、張文光，一齊起立向行埋嚟嘅曾國家副主席一齊祝酒㖭。
呢一日睇嚟好快就會來臨，真係好值得開心，你話係咪要喺七一嗰日出嚟維園慶祝吓，對祖國「還證於刁民」嘅一番好意作出善意嘅回應呢。
傳真︰2623-9278
電郵︰