吃午飯碰到人大L，佢人在江湖，身不由己，經常要返內地公幹、觀光、考察，總之藉口多多。佢久唔久就呻一次辛苦，因為啲投資考察團行程緊密，有時朝早六點半起身趕吃早餐，上飛機，落機即刻參觀；之後午飯，午飯後有座談會，跟住小休、晚飯。嘩，幾十歲人，犯不着咁樣捱餐死嘅啫。
問佢香港富豪會唔會去大東北投資？人大L話：「好︱︱難咯。東北主要搞重工業，唔啱香港財團口味，二來東北啲老工業，似係獨立王國，員工多多，公司幾乎要照顧晒員工及家屬嘅生老病死，你話點樣賺錢吖。我與當地人傾過，發覺佢哋雖然禮貌上歡迎香港投資考察團，骨子裏好驚外地人入股之後，就會撤消好多現有嘅工人、工會福利，根本唔想我哋『入侵』，所以去睇完就算嘞，情況同大西北考察一樣，曾司長、唐司長做大騷啫。」
有錢搵，香港商人老早去咗，使乜打鑼打鼓，由高官率領喎。講講吓，醒起人大飛要辭職，究竟下文如何？人大L話：「飛哥辭職，與言論自由扯上關係，中央唔高興，怕影響國際關係，因此唔願接受飛哥辭職，叫佢再考慮，希望飛哥冷靜之後，低調收回辭職信，當冇發生過。」
香港有三十六個人大，少飛哥一個，冇所謂之至，總有人頂上。計起嚟，香港三十六個，澳門人口咁少，竟然有十二個人大，實在係唔合人口比例；假如全國以人口分配人大，五十萬人一個，澳門分到一個，香港有十三個，先至叫做合理，須知道深圳人口八百萬，只得八個人大代表咋。