今時今日淨係知道做運動可以減肥？未夠㗎！
想減肥見效、郁得有價值，就要知道邊隻運動燃燒熱量最強、打走特定部位肥膏最嘭嘭聲……更加要知道每項運動的趣味以及宜忌，先至方便對號入座，持之以恒郁走脂肪！
記者：李玉蘭
攝影：陳陶鈞
化妝及髮型：IrisMak、Olivia Liu（SoImage）
ImageGirl：Ingrid、Maggie、Michelle、Kafrvcko（ImagineLtd.）
鳴謝：ModernFitness（旺角登打士街56號栢裕商業中心12/F 31061720）
全身都圓碌碌？瘦身運動便首選一些全身郁動、或體力消耗量高，總之能「全脂燃」的運動。
嫌拳打腳踢太粗魯，不如聽住音樂，跟住節拍舉舉啞鈴––BodyBar，同全身各個部位做鍛煉。
熱量消耗：150Kcal?小時
強項：全身收身，尤其是雙手。
特點：在音樂之下，做深蹲、二頭及三頭肌訓練。
動作：配合輕巧啞鈴進行的健身動作。
宜忌：一般舉九磅啞鈴已經好足夠，過重只會適得其反。
泰拳何解深得女性歡迎？佢除咗可以防狼、減壓之外，更重要係佢燃燒熱量夠強，各個動作加埋加埋，可以達到全面收身。唔信？睇吓泰國拳手個個鋼條身形就知無花假！
熱量消耗：800Kcal?小時
強項：收膊、收背、收腰、收腳……無錯，係全身收晒！
特點：鍛煉心肺功能、訓練肌肉爆炸性。
動作：以拳打、膝踢為主。
宜忌：本身有骨折、韌帶受傷不宜。運動之前一至半小時，可少量進食打底，以免餓暈。
想有效對付特定部位頑強肥肉，喺全身郁動之中，記住夾雜重點鍛煉，至可見功效！
響踏板上跳基本健康舞步法，看似簡單，但係對體能、平衡力、節奏感都幾有要求；不但可以提升腿部肌肉線條，重可以收腿。
熱量消耗：200Kcal?小時
強項：不但可以全身收身，更可重點收大腿！
特點：動作以提升心肺功能，增強下半身如大、小腿肌肉力。
動作：上落踏板、簡單舞蹈步法、轉圈。
宜忌：腳腕或膝蓋曾經受傷者不宜之外，無病無痛亦最好着防震、防滑波鞋。
FitBall市價要三至五百蚊，但係買佢之後，就可以做針對身體多個部位的不同鍛煉，尤其是如圖雙手放耳側，背倚FitBall，收腰腹最有效。
熱量消耗：190Kcal?小時
強項：收腰腹，拉長身段。
特點：鍛煉身體平衡；拉長拉直身體，借助美好儀態收身；此外，佢變化夠多，可以鍛煉肌肉，手、二及三頭肌肉線條。
動作：以身體不同部位坐或掂住FitBall做運動，部份動作更加上啞鈴作鍛煉。
宜忌：老少咸宜，所以FitBall亦有唔同大細之分，使用時最緊要揀一個啱自己Size的FitBall，能夠做出更佳效果。
爵士舞包括範圍好廣泛，現時至In嘅FunkyDance、BreakDance都係其中元素。學跳舞勝在變化多唔死板，而且重可以緊接潮流脈搏，型！
熱量消耗：150Kcal?小時
強項：可修長身形之外，更鍛煉節奏感及反應。
特點：活動講求身體協調，令你反應更好，表現更醒目。
動作：不同舞蹈步法、轉圈等手腳協調動作。
宜忌：事前要有足夠熱身；因為每個導師都有個別不同舞蹈步法，初學時忌心急，宜一步步掌握技巧。
減肥成功，磅數下滑之後，就係時候收緊身段，CrunchAway特別針對贅肉橫行的腹部位置！
熱量消耗：100Kcal?小時
強項：收腹。
特點：鍛煉下腹肌肉，增加身體平衡力。
動作：以腹部運動、SitUp為主。
宜忌：運動前一小時不宜進食。
如果對你嚟講，完全抗拒做量級郁動，又或身體曾經受傷；以下這些着重呼吸與伸展動作的溫和運動，相信會是你收身的BestChoice！
數數手指，有千百年歷史的瑜伽，大大話有二百幾種流派，因為佢可以由內至外修身，對身體健康、身心平衡起很好功用。加上進行一般運動後，身體都會生產大量乳酸，令身體疲勞，而做瑜伽正可以分解乳酸，所以建議做任何運動人士，都順便做瑜伽。
熱量消耗：瑜伽30Kcal?小時；高溫瑜伽100Kcal?小時
強項：修長肌肉線條、增加腸狀蠕動幫助身體排毒、調節胃口、改善吸收力、增加身體柔軟度、改善骨質密度、平衡身心兼減壓。
特點：運動身體「內臟」，活動全身關節。
動作：身體多元化伸展和摺曲；由頭至腳，由前至後，由外至內都可以運動。
宜忌：運動前二小時不要進食，否則好易反胃。此外，要量力而為，別死頂長時間維持住一個高難度動作。
就係因為身體有毛病，就更加要揀適當運動改善狀況；Pilates由一名軍醫發明，集太極、瑜伽、舞蹈於一身。好多時係順住音樂，每個動作都不需維持一段時間，而是流暢地去做數組組合動作，對全身作溫柔鍛煉，不會令人做得太有壓力。
熱量消耗：30Kcal?小時
強項：改善腰骨、姿勢，令身體健美。
特點：注重身體軀幹訓練，改善脊骨姿勢及呼吸技巧。
動作：集太極、瑜伽、舞蹈於一身。
宜忌：做前兩小時不宜飲食。
想達更佳效果，最重要是有恒心。因為身體要得到休息，所以每個星期做三至四次，每次做一個鐘頭運動，已經足夠。同時要專心，留心教練的動作示範，自然有更好收身功效，兼可以避免受傷。當然還要做得開心啦！
