挾着《戇夫成龍》的餘威，「阿旺」郭晉安過去半年常到內地拍劇掘金，雖然與相戀五年的女友歐倩怡聚少離多，但專情的他堅拒所有飛來蜢，可謂情比金堅。安仔日前更初次透露婚訊，計劃明年農曆一月立春前在椰林樹影底下，與女友共譜結婚進行曲。
郭晉安與歐倩怡拍拖五年，感情穩定，近半年來，安仔雖然常返內地拍劇，但聚少離多的日子反令兩口子感情有增無減，安仔還認真地考慮人生大事，要是時間許可，他希望明年農曆一月立春前迎娶女友。
其實安仔早已叠埋心水視歐倩怡為結婚對象，未知他曾否對女友作出承諾？
安仔日前在尖沙嘴接受記者訪問時說：「唔敢，我覺得感情唔係承諾，唔係承諾咗就代表永遠，每日嘅相處都係學問，亦都要睇大家肯唔肯一齊進步。我諗到出年至得閒諗結婚，因為我嘅工作已經排到今年年底。」
提到明年是盲年，不宜婚嫁，安仔想一想後說：「係喎，咁要睇吓出年立春前得唔得，最緊要都係睇番工作上嘅編排。」
安仔表示若果結婚，他會效法老友張家輝和關詠荷般，靜悄悄走到沒有攝影機的地方完成儀式，他說：「最好去一個椰林樹影嘅地方，喺好舒服嘅環境下結婚，要有度假feel嘅，真係唔好畀我見到鏡頭，始終做呢行咁耐，結婚都要拍嘢，會有恐懼症。」
安仔續說：「結唔結婚係遲早問題，我哋感情好穩定，今年我哋聚少離多，感覺反而好清晰，知道女朋友對自己嘅重要性有幾多。原來近呢兩年，事業有好轉，唔多唔少另一半對我嘅影響好大，佢令我可以安心工作，亦令我唔想喺感情上有其他選擇。」
安仔為工作跑到大江南北，他又怎樣給予女友信心？安仔不慌不忙道：「佢可以肯定到，每對情侶可以感應到佢嘅另一半，相信對方嘅感應，所以唔會行差踏錯，呢樣冇得呃㗎。」
至於安仔對女友也是一百個放心，他說：「就係因為我成日唔喺香港，更加令我感覺到佢係個專一嘅人，佢嘅所有表現令我好放心，初頭我去外地拍嘢好唔慣。上天要我哋分開一段時間，原來係一個考驗，經過呢半年，令我對呢段感情有更大嘅理解。」
經常一個男人在外地，未知曾否出現過飛來蜢？郭晉安說：「飛來蜢係睇雙方嘅，睇自己係咪心野，我都唔想，𠵱家嘅感情令我有滿足感，我好清晰㗎！」
