前年李國章轉做局長，臨時拉伕坐正做中文大學校長嘅金耀基今個月底正式退休，一班老友噚晚為佢搞個榮休晚會，三位前校長馬臨、高錕同李國章都有到，候任校長劉遵義亦在場，金耀基自詡有三個紀錄前無古人，相信亦後無來者，就係七七年任新亞書院院長成為最年輕院長，前年做校長成為中大年紀最大校長，亦係任期最短嘅校長。
佢喺網球場上更有「金一招」之稱，最犀利係上網截擊，就憑呢一招令唔少人俯首稱臣。
金老笑稱退休係因為後起之秀急起直追，佢唔夠快就要讓條路俾人上位，佢退休後會先去西班牙出席一個學術會議，返香港後就要多讀書同勤寫作。八方祝佢退休生活愉快。
臨別秋波，曾經因為反對大學「殺系」而同金校長鬧得好僵嘅中大學生會，就邀請金校長出席星期一嘅同學分享會，唔知金校長又有冇咁嘅氣量，同學生一笑泯恩仇呢？
（圖）金耀基月底正式退休，一班老友噚晚為佢搞咗個榮休晚會。
傳真︰2623-9278
電郵︰