呢個禮拜猛片渴市，冇乜正碟推出，抱住但求一笑心態，揀咗由靚仔馮德倫處男執導嘅《大佬愛美麗》。睇電影劇照，預咗係套借「基」搞笑嘅胡鬧片，令人驚喜係原來全片有紋有路，該搞笑時搞笑、該談情時談情、該打鑊勁就去盡嚟打，一啲都唔含糊。馮德倫玩魔術叻，原來首執導演筒更叫人驚喜。
記者：徐影龍
故事骨幹唔算有新意，黑幫大佬元彪臨終前想搵番喺泰國個仔（吳彥祖飾），好朋友陳奕迅跟着一道回港，代吳繼承黑幫龍頭，兼俾人誤會係基，大堆錯摸笑料因此而起。陳奕迅賣相難以跟吳彥祖、馮德倫匹敵，專心搞笑反而更為搶鏡，比《豪情》演得更放，其鹹濕下流表情及小動作，的確令人發出會心微笑。
羅家英及杜汶澤依舊搶鏡，尤其係兩父子經常互窒，對白非常之抵死。唔同嘅係羅認真去演繹內心戲時，真能觸動觀眾，反之杜搞笑有餘，惜愈見歇斯底里，恐防有朝一日會走火入魔。值得一提係戲內重有大量搞笑串星，由李力持、鄭秀文、李健仁、田啟文、李燦森都粉墨登場，連霆鋒、英皇小花同成龍都撐場，足證馮德倫在影圈之上佳人緣。
睇完全套《大》，你會覺得幾可悲，明明馮德倫想拍一齣講感情嘅戲，為顧及票房，偏偏要加插笑料及動作元素去包裝。戲內包含多條感情支線，由男女嘅「情」、父子嘅「愛」、到兄弟嘅「義」，好明顯睇到馮德倫想帶出愛無處不在嘅訊息，雖然並非段段精采，不過每每道出人在江湖嗰種無奈感，最到肉係羅家英對杜汶澤嘅父子情，借「基」搞笑實屬手段而已。
主觀地認為，導演對搞笑、感情表達僅算合格，值得讚賞反而係影像處理。戲中好多場景明顯花過心思，如黑幫街市內講數、陳奕迅雨中簽約做大佬、結尾《Matrix》式打鬥等，都甚有大片風範，而且燈光及鏡頭運用不俗，比下三流嘅追女仔式七日鮮好睇得多。
港產DVD嘅Bonus一向偏弱，故對《大佬愛美麗》亦不存厚望。特別收錄內容唔算有驚喜，預告片、一堆演員嘅文字簡介及電影硬照等差不多屬指定動作，淨得製作特輯較有睇頭。
唔係話佢有咩特技解構、演員蝦碌咁有娛樂性，筆者反而從製作特輯中，睇到馮德倫呢位新晉靚仔導演及編劇，着實非常賣力；由鏡頭擺位到演員小動作，馮都一絲不苟，就算高空翻觔斗落地等高難度動作，亦由自己親身上陣，當中令人感受到其付出嘅血汗同誠意。雖《大》片未能令馮一鳴驚人，不過絕對屬可造之材，期望在下一齣非搞笑類片種有所發揮。
