日本嘅巨胸水着女星，唔係個個都只得班麻甩fans鍾意，好似YellowCab嘅當紮巨胸阿姐佐藤江梨子，原來好受小朋友歡迎，最近佢以新片《CutieHoney》主角嘅身份，去到橫濱一間小學拍寫真，不停變身狂玩性感cosplay，同啲小朋友玩得好開心，連我大口羅拉都睇到笑吟吟。
江梨子最近為配合新片上映而推出嘅《佐藤江梨子HoneyFlash寫真集》，特登同導演庵野秀明及攝影師大橋仁，到橫濱市立岩戶小學取景。
再次着上喺電影入面多套戲服拍攝嘅江梨子，引到連導演亦粉墨登場扮蒙面壞蛋，同佢一齊勇闖校園，佢哋去邊都如影隨形，好鬼搞嘢。
江梨子一時以露臍裝同小朋友打鞦韆，又先後着上六十年代懷舊服裝扮老師教小朋友，又喺教員室昅住啲被罰留堂做功課嘅小朋友。但江梨子成日喺班小朋友面前擺出性感甫士，有啲教壞細路喎！