前綫八周年：卿姐廣發聚餐帖，特首同政府三司十一局都受邀，最後只得林瑞麟和馬時亨出席酒會，林瑞麟寒暄完急急腳鬆人。
財經事務局局長馬時亨就最膽生毛，坐低食埋嘢，重同卿姐坐貴賓席，兩人時時交談接耳，不時重細聲講、大聲笑，簡直全無冷場。前綫拍賣T恤，馬局長本來耍手擰頭，點知俾阿牛屈咗五千。馬時亨果然藝高人膽大，拍心口接貨。
嘩，卿姐係「港獨分子」，馬時亨咪變咗資助「港獨」？不過馬局長滿面春風，不但上台祝酒，重同卿姐把臂共話，由脆皮乳豬，食到雙菇鴨掌扒菜膽先至走人。卿姐在移交慈善T恤嗰陣，重喺馬局長嘅面頰印下紅唇熱吻，馬局長五千蚊買件T恤，可謂超晒值。
馬局長咁大膽，係因為佢有政治智慧。曾慶紅親口頒旨：中央同民主派冇矛盾，民主派計埋前綫，即是連卿姐亦獲得局部平反。回鄉證逐步鬆章，卿姐雖然可能包尾至有得攞，但曾副主嘅眉頭眼額，馬局長識睇過林瑞麟，佢一定認為坐低同卿姐共食乳豬，甚至你夾畀我一箸，我錫番你一啖，國家經已批准。馬局長退場，得到前綫全場鼓掌歡送，卿姐親自送到電梯口，場面溫馨和諧到爆燈。
香港電台準備今個星期請卿姐做主持。有馬時亨帶頭，廣播處處長朱培慶唔使驚。如果到時鄔曾集團及土共又試破口大罵，有馬時亨與卿姐打得火熱嘅歷史性圖片做護身符。
唉，政治有時不過係一場男歡女愛嘅遊戲，連曾副主都睇得開，下低班奴才，學吓馬局長咁有獨立人格吖。
（圖）馬局長（右）噚晚唔單止上台同卿姐（左）祝酒，之後拍賣Ｔ恤環節重收到卿姐嘅紅唇熱吻，政治畢竟係一場男歡女愛嘅遊戲。 黎樹雄攝
傳真︰2623-9278
電郵︰