有線電視轉播歐洲四大聯賽，即係英超聯、意甲、西甲、德甲。四大聯賽代表咗歐洲最高水準嘅聯賽，偏偏喺今年歐洲盃之中，意大利、西班牙、德國三支國家隊，全部在分組賽出局，四大聯賽之中，只剩番英超聯嘅代表英格蘭可以打入八強，不過對住主隊葡萄牙，打和二比二，射十二碼輸五比六，可以賴冇運，亦可以賴教練艾力遜太過保守，下半場全場死守，卒之逃不過射十二碼必輸嘅命運。
三隊之中德國隊最水皮，分組賽三戰二和一敗，連拉脫維亞都打唔贏，抵佢出局。七、八、九十年代，德國隊經常打入大賽四強，專尅死荷蘭，全隊組識嚴密，鬥志頑強，攻得狠，守得穩，呢啲特點，今屆冇晒，全隊球員正式係青黃不接，唔見有突出新人，下一屆世界盃喺德國舉行，如果唔急急重整，主辦國會好失威。
意大利隊三戰兩和一勝，入唔到八強，賴瑞典、丹麥安排賽果，實在貽笑大方。安排零比零打和就易啫，二比二就好困難，有睇過場波嘅，都知道瑞丹快上快落，球員博到盡，絕無花假，如果二比二係預定賽果，意大利佬都要佩服人家演出精采，鬼叫你自己唔識贏保加利亞五比一咩。意大利隊教練嘅戰術保守，炒咗佢或者有翻生希望。
西班牙聯賽外援甚多，本土球星好少，每次踢歐洲盃、世界盃都成績麻麻，睇唔到將來有乜嘢前途。總而言之，英超聯球賽可觀，亦能培育本土新秀為英格蘭效勞，加上俄國油王拚命為車路士買入球星，睇嚟英超聯好快會成為世界足球聯賽之王，壓倒西甲、意甲。