郭晉安跟《戇夫成龍》中的丁常旺已是不可分割，說他儍人有儍福亦講了無數次，但事實上阿旺的確賦予他名利。跟安仔算一算，這一年半來，他賺到的已接近一千萬。
《戇》劇以後，他拍攝了四十集的無綫劇《美麗在望》和《隔世追兇》，內地劇有三十集的《儍皇闖天下》和三十五集的《天下第一》，然後人家老是覺得叫「阿旺」很好意頭，安仔又接了十個多剪綵、近二十個登台騷和三個廣告，這還不豬籠入水？
安仔笑說：「唔好講幾多錢啦，演藝生涯唔係用錢去衡量嘅。我啱啱至同無綫續咗約兩年，今次續約只係用咗五分鐘，公司講咗年期，加薪幾多，我就話OK啦，加薪幅度同理想中差唔多。」
安仔揚言如此爽快地續約，除因為無綫過去兩年對他不薄外，他對發展亦甚有信心，他說：「未來我會一半喺香港，一半返內地，以錢嚟講，喺內地拍劇嘅人工好過TVB好多倍，拍一個內地劇，喺TVB做兩年都未必賺到。」
無綫每年自製多部劇集，但近數年來，當中成績較佳和令人留下印象的就只有《戇夫成龍》和《衝上雲霄》，其他的乏善足陳。安仔對此說：「無綫每年拍五百至六百集劇，要每個劇都出精品係好難，有啲嘢你又預計唔到，正如阿旺呢套劇，點諗到會有咁好嘅成績？不過我對就嚟開工嘅新劇《同撈同煲》有信心，呢套戲好吸引我。」
無綫一直鬧小生荒，至今年才集中火力谷奧運六星，在芸芸新紮師弟中，不知安仔較看好哪一個？他說：「我睇好吳卓羲，佢畀到人刻苦勤奮嘅感覺，呢樣可以拉近同觀眾之間嘅距離，不過際遇就要睇佢嘅造化。」
四十歲的郭晉安頭髮濃密，沒有肚腩，身形甚弗，比起很多同年男士，安仔還沒被中年危機困擾。安仔公開其長春的秘方，他說：「我隔日就打網球做運動，我唔蒲、唔飲酒，每日食靈芝孢子，唔好有複雜思想，唔好放縱自己，開心啲、對生活有品味啲，個人都會keep得好啲。」
採訪：朱倬誼 攝影：仇志德 場地：瑪哈吧
