退休賓架K去四川參加扶貧活動，上機前一日，與左丁山在大酒店食飯，食剩成碟排骨，因為大家下午都有約會，唔想打包，費事拎也，你眼望我眼之後，賓架K話：「我哋太過奢侈，浪費之至，罪過罪過。」信咗佛乎，香港日日都食剩唔少食物，好似冇乜人理會噃？
賓架K話：「我以前都係咁諗，但自從退休之後，經常返內地參加扶貧活動，去得內地省分多，就知道中國雖然經濟增長迅速，但財富分配極度不平均，你到陝西農村睇吓，就知道我哋今日呢餐午飯，冇一千都要八百，喺陝西可以夠好多人食用也。」
呢啲大道理，係一定啱嘅，但係經濟學原理話：拯救人於貧窮，須給予窮人機會，而唔係給予不斷嘅救濟。賓架K等有心人、善心人時時出錢出力，返內地扶貧，一定好心有好報，但殘酷嘅事實係，整體嚟講，陝西農民、四川農民究竟有冇因為香港人嘅扶貧活動而有全面地、系統地脫離貧困？答案係冇，香港人嘅努力只係提供少量止痛劑啫。要中國農村脫離貧困，縮減城鄉差距，非中央政府努力不可。
賓架K講講吓，諗起一位老友在深圳發展地產，愈豪華、愈係大屋愈好賣，買家當然唔係香港人，而係內地大款；一係大款到廣州食晚飯，連埋飲酒，動輒過萬元人民幣，等於三四個陝西農民嘅全年收入。中國的確係富起來，不過只係沿海東部省市發達啫。俾賓架K講兩講，左丁山不忍浪費，食多幾嚿排骨，偏偏呢間灣仔大酒店嘅鎮江骨冇厘水準，盞激氣。