樓市轉淡，不少投資者都趕出貨，美聯主席黃建業，年初買入跑馬地禮頓山，蘭西聽聞，剛連租約賣咗。個單位係九座十九樓C室，近千五呎，成交價接近千六萬，呎價過萬，市場人士話屬合理價錢。
經紀話，個單位一月底以逾千二萬買入，短短五個月，就賺到三百四十萬，黃主席眼光都唔錯。
蘭西記得，黃建業上個月先至賣出淺水灣麗景園，雖然兩次都有錢賺，不過近期樓市回軟，難免令人懷疑，佢睇淡後市，先至頻頻出貨。
不過，黃建業回應話，價啱先至會賣，唔單只無睇淡，最近重積極睇樓，打算換貨。
聽講話，黃建業早兩日，喺山頂新項目現身，睇過加列山道及歌賦山道新盤。睇嚟，佢今次換貨，會係愈換愈豪。
市況不明，部份投資者急於出貨，甚至不惜以「筍價」賣樓。中原蔡創文話，資深投資者所持沙田第一城三十六座高層C，三八九呎，原叫價百二萬，因冇承接，眼見市況放緩，終以近一百零四萬，每呎近二千七賣出。
件貨一月以近九十三萬買入，裝修後放售，計埋所有費用平手離場。
個價錢比日前同座低層，八十四萬，兩日差近二十萬，即使計埋樓層分別，足見市場缺乏方向。單位銀行估值百二萬，比成交價高近一成七，買家真係唔怕做唔到按揭。
薄扶林貝沙灣，得閒無事都鍾意搞番一兩個表演宣傳吓，噚日就同廸生創建，搞名表Show兼午宴，有名模示範，又有唔少名人到場，場面都幾熱鬧。
傳媒朋友雖然係被邀請之列，但就變咗做布景板。記者們一早準時到達，睇住各位名人一個個入場，不過，睇表同用餐嘅地方，就要特別間開。記者要做嘢，就惟有等，喺外面企咗個幾鐘，先有幸可以同啲嘉賓傾到幾句。唔通啲名人有記者恐懼症？
港人逐漸唔再逆來順受，勇於爭取更好生活空間。除咗全城鬧得熱烘烘嘅反維港填海，部份灣仔同美孚居民，又識得運用城規條例賦予嘅權利，嚟改善環境。
灣仔居民衝着合和船街大型酒店項目MegaTower而來，向城規會申請，限制地積比率五倍，以及水平基準以上百二米。至於美孚居民，就要求將第八期鄰地，改劃做政府、機構或社團用地，希望多啲「透氣空間」。新世界原擬喺度起樓。
城規會睇完啲申請，覺得冇足夠資料支持，理據未夠充份，冇接納。
蘭西
電郵地址：
