樂壇大姑媽艾頓莊（EltonJohn），每年六月尾都會喺自己倫敦間大宅度搞番個大型派對，為自己名下嘅愛滋病慈善基金籌款，唔經唔覺已經係第六年。點知咁啱撞正歐國盃英格蘭對葡萄牙嘅大戰，搞到大姑媽掛住聽波，成晚心不在焉。
呢個星光熠熠嘅派對，係得到著名鐘表珠寶商Chopard贊助，身為主人翁嘅艾頓莊，當然戴住Chopard嘅珠寶裝身，就連到場嘅嘉賓，澳洲女歌星KylieMinogue、NatalieImbruglia、名模艾麥菲遜（ElleMacpherson）個個都珠光寶氣去撐場，而艾頓莊個老友伊莉莎伯凱莉（ElizabethHurley），重帶埋男友艾雲尼亞（ArunNayar）到場㖭拍！
不過據講喺開派對嗰陣，同時間舉行緊歐國盃英格蘭對葡萄牙嘅大戰，同碧咸（DavidBeckham）好熟嘅大姑媽，雖然要招呼人客，唔可以睇波，但佢全程帶住個迷你耳筒收音機喺身度聽波，為碧咸打氣。可惜最終碧咸射失十二碼而間接令球隊輸波出局，搞到艾頓莊無晒mood！