七一上街有理，不上街亦有苦衷，各有心情，等我好心估吓，你為甚麼不上街：
一、不同級數的「陳壽山」不斷打電話來，讚你老婆賢淑，令你神經衰弱。事關，你根本沒有老婆，而且，你係女人！
二、你在大陸包了二奶，有關單位一直隻眼開隻眼閉，你怕遊行後會遭內地捉住痛腳敲詐。
三、兩害取其輕，你唔想董建華下台，因為你更怕梁振英接班！
四、你對政制發展的前景極度悲觀，覺得遊行都冇用，遲吓會採納譚惠珠方案，闢室燒炭！
五、剛做完整容手術的你，怕警方對遊行人士叉鼻插喉，你個鼻冇買保險，冇得賠的，無謂冒險。
六、你雖然支持「爭普選」，但對「慶回歸」的口號完全無feel，而暫時亦未想出還甚麼於民可行。（還錢還息，都唔錯。）
七、你阿媽叫你千祈千祈千祈咪上街。你阿媽係乜水？1A！
最後七點一個不上街遊行的理由是：……係咯……今時今日，容乜易上身，大家心知肚明。