下個星期四特區慶祝回歸七周年，八方四處打聽，都聽唔到有邊個領導話會嚟祝賀，唔知係咪見過鬼怕黑，睇見溫家寶總理舊年嚟香港，一走就有五十萬人上街遊行，唔係幾好玩。
冇領導嚟，老董同問責高官一身輕晒，7.1去完升旗禮同出席酒會，就可以返屋企睇有線，聽商台。不過，八方噚日聽到，亞視都會直播遊行，梗唔係陳永棋作反，而係阿飛主持嘅港台節目《議事論事》嗰晚有個時段，阿飛已經請咗嘉賓上嚟，而鄧景輝就會喺現場直擊。
係人都知，中央同特區好緊張今年7.1，因為對於胡溫曾董嚟講，上街人數只許少，不許多一個。咁大陸已經滅咗鄭大班同黃毓民兩把聲，鄭大班一家人前幾晚又「被迫」離開香港去咗美加度假，7.1之後先至返嚟，大班人在江湖，身不由己，我哋就重可以自由上街，應該好好珍惜咯。
又前《九十年代》執行總編輯方蘇自從棄文字從畫工之後，轉眼又自學咗五年水墨畫，趁7.1一周年，佢由今日起一連三個星期喺佢位於中環伊利近街嘅「楊方創作室」舉行「7.1共同記憶畫展」，啲畫全部都賣，有興趣可以去睇吓。
（圖）方蘇水墨畫作品《一家四口》，係佢舊年7.1嘅其中一個記憶。
傳真︰2623-9278
電郵︰