老人家總希望安享晚年，奈何81歲的崔婆婆還要為生活操心。兒媳離婚，崔婆婆不忍孫兒淪為孤兒，多年來負起供書教學責任，已耗盡以往辛勤工作所得積蓄。由於培仔須由父母提出申請，方可申領綜援，刻下兩婆孫靠一份綜援金過活，三餐難飽足，日子難過。
談到兩婆孫眼前苦況，崔婆婆不禁涕淚漣漣。「我自細冇咗爸爸、媽媽，唔想培仔好似我咁做孤兒，但日子好艱苦，如果唔係為咗個孫，我真係唔願意捱落去，……行到今時今日呢個地步，我都冇晒辦法，唔知點算。」
現年17歲就讀中三的培仔，為崔婆婆次子所生，培仔5歲時，父母離婚，自此隨嫲嫲生活。「我有一個妹妹，佢跟媽媽，我哋已經好多年冇見面；至於爸爸，早幾年喺大陸再結婚，佢好少返嚟香港，一年只見佢一、兩次。」培仔說。
崔婆婆表示，任職司機的兒子早年還有給兩人三數千元生活費，日子勉強可以應付，可惜他近年經常開工不足，自顧不暇，崔婆婆惟有靠自己當年在五金廠工作僅餘的積蓄供養孫兒，直至年前因為山窮水盡，才被迫申領綜援金。
「個仔近呢一、兩年再冇畀錢我，我申請到綜援，但培仔嘅監護人係佢爸爸，始終要佢爸爸親身返嚟香港辦清楚手續，培仔先有機會攞到綜援，但我都好難搵到佢爸爸。」
在無可奈何下，兩婆孫現時靠一份綜援金生活，扣除租金及基本雜費開支後，已經所餘無幾。
記者日前往探望兩人時，崔婆婆正在弄晚餐，只見她僅預備了一小碟雜菜肉絲佐膳，不禁令人擔心發育中的培仔是否獲足夠營養。
崔婆婆歎道：「我都唔想刻薄個孫，但一份綜援又要交租、又要開飯、又要讀書，真係兼顧唔到，𠵱家培仔返學嘅午餐好多時淨係食幾蚊炒麫，好彩呢粒孫好乖，好體諒嫲嫲，從來冇埋怨過。」
培仔學業成績不俗，崔婆婆不想孫兒因為家庭問題輟學，無奈她經濟擔子愈來愈重，日前透過社工向蘋果日報慈善基金求助。
崔婆婆說：「我𠵱家只希望捱到培仔讀完中五，盡咗做嫲嫲嘅責任。」
社會福利署發言人表示，一般而言，綜援審批是以家庭為單位，未滿十八歲或在學學童，須由家長或法定監護人代為申請。
發言人建議崔婆婆盡快聯絡地區社會保障辦事處，讓職員詳細了解其需要。蘋果基金有見兩婆孫困境，撥款六千元協助兩人暫度難關。
捐款編號：C1417
暖流熱線
電話：29908688
傳真：23702192
電郵：
網址：