恒指大升逾3百點後，昨日整固。下周初有聯儲局議息、美國將伊拉克政權移交臨時政府，重有7.1假期同大遊行，咁多不明朗因素，大市應份牛皮，未來幾日炒輪，過勇不宜，小注怡情就冇所謂。
個別國企股依然強勢，中鋁（2600）收報4.025元，升4格，升幅2.5%。受正股帶動，兩件中鋁Call輪打入10大升輪榜。最醒係9214，飛升69%，成為輪王；9521彈高25%，榜上排名第4。不過，兩隻輪成交都好奀，前者12萬銀多啲，後者10萬都未夠。
9214係末日輪，現價24仙，溢價12.3%，槓桿率16.8倍，行使價4.28元。以現價買入9214，博正股喺5個禮拜內升到4.52元之上，隻輪揸到尾就有錢賺，機會唔係冇，風險當然大。短炒呢件本來有得諗，但弊在交投疏。
9521成交更少，數據亦唔靚，8月尾到期，溢價62.6%，槓桿率89.4倍都冇用，睇吓行使價6.5元，就知道唔實際。
實際得多嘅係9253，呢件玩到8月27日，行使價3.88元，係價內輪。現價0.5元，溢價8.8%，槓桿率8.1倍，數據唔講得好靚，起碼唔算太過離譜。
中鋁重有幾件遠期輪，都係高溢價細槓桿貨色，點買得落手，例如9749，明年10月屆滿，溢價82%，槓桿率只得6.3倍。
章盛