去年7.1五十萬人上街，當中一半來自中產階層。有學者相信，經濟復甦有助疏導中產人士的不滿情緒，但不代表他們都不會再參加遊行。教育水平愈高，對民主訴求愈強，中產人士去年上街，主要都不是基於經濟訴求。
「我哋今年再上征途，係要畀全世界知道香港發生緊乜事。邊個唔想安定繁榮呀？但係又使唔使扮狗叫來換取安定呀？」香港業主會會長佘慶雲說起香港人爭取民主也遭受抹黑，就火上心頭。他已號召會員，與負資產業主大聯盟及夾屋大聯盟一起，7.1維園再見。
佘慶雲說，今年他們參與7.1大遊行的主題跟往年不同，去年的口號是「董建華下台，好事自然來。」今年則是「香港有希望，咪當我老襯」。他解釋，去年最不滿是董建華施政，今年最不滿則是中央對香港的政策，「今年會少啲鬧董建華，多啲鬧中央。都唔知中央搞乜，有啲中央官員自己唔檢討一下，講到上街好似賣國咁。」
「對於『還政於民』，我哋嘅演繹好單純，政府做得唔好，人民就有權鬧，有權換另一個。『還政於民』唔係好似北京講嘅無政府狀態。」負資產業主大聯盟主席陳啟明表示，他們當中有很多成員均來自管理階層，明白管治與民主的關係。
中文大學社會學系副教授陳健民指出，中產階層都是教育水平較高的一群，他們對民主普選的訴求不會因為經濟轉向而改觀，「中產對民主訴求一向好強，佢哋都睇得到香港政治制度嘅問題。」他說，去年7.1，純粹表達經濟訴求的遊行人士並不多。他估計經濟改善會令遊行人數減少，但並非關鍵因素。
「好多業主撐唔住，俾銀行收樓，負資產人數梗係少咗喇，但係問題根本仍然存在。管治嘅人無能，令中產階層咁多年來嘅努力蒸發，我哋需要一個更換政府嘅機會；一個由人民選出嘅政府，就算係衰，人民都心甘命抵。」陳啟明說出了施政者管治失誤之下，中產人士對民主普選的期盼。
陳啟明說，單是負資產人士，今年7.1便會有二千人上街。佘慶雲則估計最少有數百名業主會成員參加大遊行，「雖然上街未必有用，但係嗌咗出來點都舒服好多。」夾屋大聯盟也集合了八個屋苑的業主，七月一日，相約於維園。
記者：蔡元貴