警方高調嚴打娛樂圈毒潮，繼周永恆因涉嫌藏毒被捕後，日前吳浩康亦步其後塵，有傳還有數名藝人成為警方鎖定的目標。劉浩龍昨日對此竟說：「有證據咪拉囉！」更指此舉會影響藝人形象。
近日娛樂圈接連有新晉歌手涉嫌藏毒被捕，使樂壇形象受損，據知警方更經由卧底線人得知尚有多名藝人涉吸毒，有報道指警方已經鎖定數名藝人做目標。
當警方高調嚴打娛樂圈毒潮之際，劉浩龍昨日到港台錄影網上節目《TeenPower──半島冰室》，提到警方已鎖定數名藝人時，劉浩龍激動地說：「使乜嘢擔心？行得正企得正，有證據咪拉囉。我知道警方想警惕一啲人，未有證據拉人前，就會俾啲雜誌亂寫，咁會影響到我哋呢行啲人，好似係壞蛋咁，咁樣好唔公平。唔好影響我哋嘅事業同形象，唔係只係娛樂圈先有唔好嘅人，全世界都有啦，我相信每個歌手都會自律。」
入行已七年的劉浩龍自言從未受毒品引誘，他更打趣說：「女色算唔算呀？我全部啲朋友都好乖，全部係正人君子。我連毒品都未見過，只係過關時喺機場見過啲樣本咋。」他更教同場的吳日言和鄭融見到毒品要sayno。
另一方面，傅珮嘉早前與Boy'Z成員Steven傳緋聞時，被吳浩康（Deep）稱呼為「嗰隻嘢」，二人因而傳出不和。昨日傅珮嘉到火炭為其新歌《給魔女之吻》拍攝MV時，其中一幕需要大哭，傳珮嘉說：「我都會諗吓呢一排唔開心嘅新聞，咁就會喊得出，我最憎被人屈，話我做新聞。」
傅珮嘉其後更主動提起吳浩康，她自爆說：「我聽講有人話阿Deep件事係我放料出嚟，我覺得好好笑，呢啲嘢要有根有據，咁都有得講，真係唔該晒。」她說其母一早看到報紙即敲其房門說：「阿囡，你千祈唔好做呢啲嘢。我覺得身為前線藝人，應該做一個好榜樣囉。總之我就冇做過犯法同一啲唔健康嘅嘢。」擺明揶揄吳浩康。
採訪、攝影：駱華齡、胡比
