港股經過周四大升逾300點及在美股回吐下，恒指噚日仍反覆上升21點，收報12185，可見買盤相當有韌力，全日成交123.64億元。
不過，平安保險（2318）表現就平平，股價破底收市，報10.30元。噚日雖然見到高盛在10.30元水平列陣接貨，但德銀的沽盤亦唔弱，似乎有基金正在洗倉。Cookie話，據聞今次平保國際配售，幾乎是認購幾多就有幾多，令到芬佬失預算。
廸生創建（113）宣布盈利倍增後，利信達（738）亦宣布扭虧為盈賺3567萬元，相信陸續公布業績的零售股表現唔會差，自由行果真發揮威力。廸生噚日勁升6.5%，利信達更大漲25.6%。
下周公布業績的莎莎（178）將更矚目，一波估佢盈利增長逾倍，派息比率百分百，即係賺幾多派幾多，目標價4.10元。卓悅控股（653）相信會一齊受追捧，噚日升2.4%至2.10元。
新宇（8068）5供2計劃截止，獲107.01%認購額。不過睇番認購詳情，只得3個股東按股權比例認購供股股份，餘額由5名股東提出額外認購，即係話合共4.256億股供股股份，僅由幾個股東包起。
新宇公布完供股結果後，股價抽高32%至6.5仙，較供股價5仙高30%。黑客話，股價突然炒高，可能是有人想托高股價散貨，可惜此股成交一向薄弱，即使股價再大升，都未必有人肯跟。
電盈（008）將於第四季公布機樓發展大計，相關住宅單位可望在兩三年內推出市場，咁咪即係07年新盤供應量又再上升？如果阿虎係孫公，就一定唔畀佢補地價改用途，因為實俾人話阿董明益李氏家族。
阿虎