歌神許冠傑（Sam）早幾日同新寵Annabelle去西貢拍《心裡日記》MV，唔知阿Sam係咪因為近排忙緊做演唱會嘅嘢，搞到好耐冇去沙灘游水，佢一見啲水咁清澈，竟然相當興奮，成日喺度玩水。原本佢哋由上晝七點拍到中午十二點，但阿Sam就愈拍愈興奮，愈玩愈開心，結果玩咗十一個鐘，搞到傍晚六點先收工。
由於當日太陽相當猛烈，阿Sam曬咗成日搞到塊面紅卜卜，好在Annabelle做足防曬工夫冇曬親。原本當日阿Sam應承咗請班工作人員去西貢食海鮮，但結果阿Sam玩到忘形唔記得咗。
另外，阿Sam呢個月底再開六場演唱會，阿Sam嘅哥哥許冠文同許冠英都有內部訂飛，點知因為內部認購超晒額而被cut飛，許冠文由四百八十張減到三百六十張，許冠英就由二百張減到六十張，真係手足都冇情講！
Twins最近幫日清食品拍廣告，以滑浪選手、印第安人同廚師等多款造型亮相，鬼馬有趣。鍾欣桐同蔡卓妍唔單止披上羽毛，喺面上搽油彩扮印第安人，佢哋重企喺滑浪板上擺甫士，充滿活力，唔知現實生活上佢哋係咪滑浪高手呢？
賭王何鴻燊嘅四姨太梁安琪接連做咗兩本雜誌嘅封面人物，當中有指何鴻燊嘅得力助手李志強係佢哋兩個嘅媒人。
噚日何鴻燊喺上環寫字樓出現時，被眾多記者包圍。何鴻燊講到呢件事，就心平氣和笑笑口咁話：「我未得閒睇雜誌，今日唔答嘢啦。」講完就匆匆忙忙咁離開。
導演黃真真早前為無綫八頻道拍攝《星光剪影：黃真真特輯》，內容講佢以前由DJ轉去讀電影，同埋後嚟喺美國拍戲嘅經歷。原來黃真真試過幾乎破產，要靠碌信用卡嚟開戲，卒之到佢回流返港後，因為拍咗齣《女人那話兒》得到金像獎「最傑出青年導演獎」而上位。黃真真話覺得拍電影令佢有幸福感覺，佢會用一生嚟拍，希望有一日可以企喺奧斯卡頒獎台上頒獎。但點解唔係領獎呢？
黃貫中噚日去商台客串做《嘩！嘩！嘩！打到嚟！》嘅主持，講到香港七．一遊行同嚟緊九月立法會選舉，佢話：「我覺得天下烏鴉一樣黑，官場始終都係一個污糟嘅地方，其實幾矛盾，自己作為一個香港人，真係想參與，但係你又無從了解呢件事嘅真相，我又唔想好麻木去支持或者反對某啲嘢，除非嗰樣嘢好清晰咁出咗嚟啦。」
