趙世曾千金趙式芝前晚往中環出席Bulthaup廚櫃公司開幕活動，早前其母姚煒大爆她曾患抑鬱病，前晚趙式芝說：「我都知你哋會問㗎啦，我性格一向內向，好鍾意收埋自己。」
趙式芝續說：「嗰時喺英國讀書，冇乜朋友，又覺得父母唔了解自己，咁啱嗰段時間有親戚過身，又唔可以返香港奔喪，嗰時我都有睇心理醫生輔導，重要食藥㖭。」
問趙式芝有沒有傷害自己，甚至尋死？她說：「咁又冇咁激，多數係喺街遊蕩唔返屋企同埋飲酒囉。」她表示自二○○○年返港，有拖拍，又多了和父母溝通，病情漸漸康復，現在的她以工作行先，她說：「我𠵱家有三個大客，就好似打三份工咁。」
採訪、攝影：JessicNgan