一路以嚟，以科幻RPG為賣點嘅Game不少，可惜為令畫面及戰鬥更天馬行空，每每都加入終極魔法、召喚獸、古代血統等元素，硬係覺得不倫不類。Namco王牌RPG《XenoSaga》系列，由未來背景到人物設計，都好冷冰冰，兼且人同人打外，重加入機械人同機械人對打，徹頭徹尾賣科幻，故事更跨越一萬年，絕對屬一部史詩式科幻巨著。
記者：徐影龍
當年高穚哲哉喺PS上創作《XenoGear》時，由於構想實在非常龐大，頭尾達宇宙曆一萬年，故此須分五大章節斬件推出。而嚟到PS2嘅《XenoSaga》系列，屬前傳式嘅首部曲，主要交代番事件起因及眾人背景；不過新一集《XenoSagaEPII：善惡之彼岸》，上集謎團未解開，卻又帶出更多人物及謎團，整個系列真係可拍住《星戰》咁有排出。由於世界觀及故事非常之壯大，明顯地廠方亦想將劇情盡量收錄喺Game入面，所以經常出現交代劇情嘅CG，就以開首為例，講述14年後嘅主角Jr.，居然連播8段CG，玩家當然可更為了解劇情，不過心急人士大可按Start掣後，再按「三角」，就可快速跳過每段CG，拿拿臨開波殺敵。
當年《XenoGear》獲得空前成功，撇除全科幻RPG元素，其戰鬥系統亦的確值得一讚。早在PS年代，已為RPG加入連技系統，而且重係玩家自行組合，如「□＋□＋△＋△＋○」，拳打腳踢任你駁，做出千變萬化嘅攻擊。
嚟到今集更進一步，加入高度概念，三個攻擊掣分別代表唔同高度，針對敵人弱點攻擊將有額外收穫，如空中偵察機用最高嘅△掣狂攻，可達致會心一擊、中毒或冰封等附加效果，所以努力搵中敵人高度弱點非常重要，尤其面對Boss級敵人，愈早知道弱點，戰鬥將會愈輕鬆。
《EPII》系統可算跟以住一樣咁複雜，相信未接觸過前作嘅玩家，會畀個複雜系統嚇親。
打開Menu，一大堆分類唔在講，重要每個選項都有自己一套演繹方法，如Ehter原來等同魔法、各類Skill要某程度S.Pt先學到、Tech係每招屬性（連技研究必讀）等，每每都跟玩開嘅傳統RPG唔同，唔好話靈活運用，連消化都要花一輪時間，不過向好方面睇，玩落新意充實得多，而且好講戰略部署，鍾意用腦嘅肯定非常滿足。
抵讚：長篇大論真係有排玩、對應PrologicII效果有意外驚喜。
要彈：系統實在非常複雜、CG雖多可惜畫面普通。
遊戲類型：RPG
遊玩人數：1人
行貨售價：$425（普通版）/$1,299（特別版）
對應機種：PS2
開發商：Namco
今集跟之前《XenoGear》同《XenoSagaEPI》一樣，同樣設有大大盒限定特別版，收錄內容除一本精美資料集外，最吸引係封面女主角KOS-MOS嘅Figure連三大武器，以及超型電單車模型連台座，製作相當之精美傳神，可惜特別版賣價唔平，行貨都賣成$1,299，值唔值得真係見仁見智喇。
