近年來不少歌手因吸毒而被捕，一向形象健康的周潤發呼籲同業不要以身試法，將辛苦鋪出來的前途毀於一旦。而除發哥外，不少藝人對此亦深表惋惜，奉勸青年人要潔身自愛，遠離毒品。
繼周永恆藏有軟性毒品認罪後，吳浩康前晚涉嫌藏有1.2克可卡因，被警員押返警局，准以五千元保釋。近年來演藝界已先後有多位藝人如杜德偉、蘇永康和安雅等被發現藏有軟性毒品，外界對娛樂圈藝人吸食毒品個案不斷增加，當然感到反感，而形象一向健康的周潤發亦十分關注年輕一輩歌手的品格，他認為歌星作為年輕人的偶像，不應以身試法。
發哥明白做藝人壓力很大，但他認為吸毒是不可能減壓，他昨日接受電話訪問說：「其實大家都知道毒品嘅禍害，但依然有咁多歌星會選擇食毒品嚟放鬆，呢種想法完全係錯誤嘅。藝人係好多年輕人嘅偶像，真係唔應該以身試法，做一個唔好榜樣畀歌迷，歌手好唔容易先可以喺樂壇站穩腳，如果因為吸毒自毀前程，實在令人惋惜。」
發哥續說：「吸食毒品不但唔能夠減壓，反而會令人更緊張同彷徨，而且會出現幻覺，所以吸食毒品係百害而無一利。我自己會選擇攝影同做運動嚟放鬆自己，其實藝人要減壓可以有好多比較健康方法，好似滑水、游水、打波呢啲戶外活動都可以考慮，再唔係可以刺激啲學王敏德揸飛機或跳傘。」
除發哥外，不少藝人亦對此事各抒己見。
關心妍：吳浩康係一個唱得嘅新人，我覺得藝人應該珍惜前途，就算壓力大都唔使掂毒品，毒品一掂就冇得翻身㗎啦。
陳慧琳：吸食毒品會有生命危險，年輕人唔應該做一啲令父母心痛嘅事，藝人壓力雖然大，但我認為減壓可以有好多種方法，我自己就會選擇浸香薰浴同約朋友傾訴嚟減壓。
薛家燕：藝人平時有壓力，都有唔同減壓方法，靠藥物解決唔到問題，咁樣只係逃避現實。
方力申：噚晚知道都幾shock，如果一個歌手同毒品扯上關係而影響事業好可惜，毒品係會影響前程，連續兩個月有兩單咁嘅嘢，都幾驚會影響外間人對我哋新一代歌手嘅睇法。
楊千嬅：我身為禁毒大使，好了解點解佢哋會咁，因為精神同生活嘅壓力，令佢哋搵咗一個錯誤嘅方法去紓緩壓力。
鄭融：我覺得唔應該用毒品去減壓，根本冇藉口去吸毒，解決壓力有好多方法，有問題係要去面對，身體係父母所賜，吸毒自殘身體，會對父母唔住。
採訪：陳月媚、李珮洳、馮美茵