港股噚日大升313點，收報12163，成交高達182.69億元。如斯大好形勢，平安保險（2318）首日掛牌竟一度破底，全日在高盛、雷曼及野村支持下，僅力守10.40元收市，只較招股價10.33元輕微高出0.68%。平保表現咁差，令人懷疑重可以守幾耐，如果唔能夠忍受破底之苦的股民，似乎現價沽出是最佳選擇，留待破底後再吸納都未遲。
港股大幅回升，主要是國內原則上容許保險資金到海外投資，加上憧憬國企將有併購浪潮，以及國內繼續放風話宏調見效，下半年通脹會回落至3%以下，明顯反映中央唔想加息，以免拖垮經濟。
國企指數勁升逾5%，但哈動（1133）因否認引入外資股東，股價先升後跌，收報1.85元，跌4.6%。值得注意是，好多時地方政府有意出售國有資產，管理層未必會知道詳情，因此哈動併購概念並未完全消失。
另一隻大型國企中海集運（2866）獲大摩持15.14%H股，噚日升2.8%至2.725元，成交達1.69億元。市場估計有關股份由國際配售而來，大摩今次坐咁多貨，難免令人對隻股有所憧憬，大摩點樣至可以全身而退，相信唔使多講。中海集運有跟炒博反彈概念，初步目標價是浮上水面，即3.175元，以噚日收市價2.725元計，上升空間有16.5%，博得過。此股下月初就會加入大摩中國指數。
零售股廸生創建（113）全年盈利增長近一倍，不單派息慷慨，重10送1紅股，今日股價應有睇頭。法資則睇好莎莎（178），估計全年盈利亦會升近一倍，兼大派股息，噚日股價率先上升7.3%。零售股呢次可能有排玩。
阿虎