諗住期指結算前，港股重會爭持多兩三日，點知好友已忍唔住，一日反攻，已將形勢完全扭轉，恒指重上3條平均線之上，轉危為安。
個人雖睇好後市，但之前個市嘅走勢，確實唔敢恭維，因為個上升裂口一守唔住，就係咁先；好在前日出現咗短期好敏感嘅入貨訊號，而升降指數亦有改善，先有信心大市整固完之後會再上過。睇噚日個勢，大市升浪已可確認，而大行買貨，更係前仆後繼，胸口成個勇字，呢個浪，可能升到你唔信。
恒指由開市升到收市，中途冇乜壓力，結果高收12163，大升313點，成交更大增到182億元，升降指數升勢亦轉急。噚日嘅突破性升勢，連同短期下降軌，一次過衝破4重阻力，最重要係有大成交配合，短期先反覆上試月中的12539高位，中線以大型頭肩底衡量，目標可指向14000。
國企個勢好勁，大部份升幅都由6%至10%不等，國指高收4188，大升212點，升幅5.3%，國企成交亦由前日的23億元大增到41億元。早輪嘅調整，大行有機會買到平貨，噚日見到佢哋重係買得好急。國家發改委預計6月份嘅CPI升幅約5%，掃除了市場對短期加息的憂慮，入市轉趨積極。
鋼鐵股以鞍鋼（347）表現最突出，高收2.625元，大升11.7%，馬鋼（323）同重鋼（1053）都有逾8%進帳。早幾日跌市，馬鋼嘅抗跌力最強，低位2.1元，僅微跌穿6月初大跌嗰日嘅低位2.15元，其他如重鋼近日低位2.45元（6月初低位2.675元），鞍鋼2.275元（2.575元），都跌穿好多。馬鋼個勢咁強，好明顯係有大盤在收集，大戶今次揸重貨，日後升幅必大。
睇走勢，馬鋼亦係一舉而升穿4重阻力，包括10日線（2.30元）、20日線（2.32元）、50日線（2.4元）同大型頭肩底嘅頸線（2.45元）阻力，且有1.03億股（5月18日以來嘅高紀錄）大成交支持，照度上去，目標3.2元。
今年首5個月，馬鋼鋼材平均售價比去年平均價升28%，銷售收入101億元人民幣，佔全年目標44%，估計04年每股盈利0.51元，派息0.2元，預測PE不足5倍，息率8厘，數據咁好，有力推升股價30%至50%。
郭兆誠