當年一手發掘張栢芝的朱永龍，曾因合約問題而與栢芝鬧翻，近期轉而力捧十八歲新人郭芯其。郭芯其對於被捧為栢芝師妹直言唔衰得，更揚言做人必須飲水思源，與朱永龍一條心打天下。
張栢芝前經理人朱永龍近日自組新公司喻絲圓娛樂集團，頭炮將力捧十八歲新人郭芯其。郭芯其日前在銅鑼灣接受訪問時，坦言栢芝師妹這個稱號不會對她構成壓力，反而是知道朱永龍很疼她時，才覺得今次一定唔衰得。
對於朱永龍與栢芝之間的恩恩怨怨，郭芯其說：「我知道有件咁嘅事，但詳情唔太清楚。我好欣賞栢芝姐姐，我知佢係好演員。」問她會否覺得栢芝師妹這名稱為她添壓力？她說：「唔會，我好榮幸啲人咁講㖭。」
栢芝當年飛起朱永龍投靠中國星，此事曾令朱永龍不快。談到栢芝的做法，郭芯其表示因不了解內情，所以無法評論，但她說：「做人要飲水思源，我唔知將來會發展成點，但我會同龍哥同埋公司嘅同事一條心，我一定唔衰得。」郭芯其未來會先以歌手姿態殺入娛樂圈，其唱片將於下月推出。
採訪：朱倬誼
攝影：仇志德
化妝：江中平（A&VMakeupschool）
髮型：MichaelLam（HairCulture）
服裝：Killar
