大市突然急升逾300點，好多原來睇淡嘅炒家，真係轉view都轉唔切，追貨追到氣咳。小初好彩冇執輸，早排聽經紀黃支笛，走咗去買冠捷科技（903）炒業績，噚日終於成功食胡。
不過，經紀黃話小初太短視，因為多間外資大行見過冠捷管理層後，均將預測盈利調高，維持買入的評級。
冠捷前日公布首季業績，盈利比去年同期勁升135%。噚日股價即刻有反應，急升7.5%，收5.35元，成交股數1120萬股，金額5900萬元。今次冠捷業績咁靚仔，主要係因為液晶體顯示器業務增長迅速，同埋邊際利潤提升所致，呢個情況估計上半年仍會持續。
除咗冠捷外，由舊年自由行概念炒到𠵱家嘅莎莎國際（178），將於今個月28日公布全年業績。噚日已經有人估計業績靚爆鏡，兼且公司大把現金，故此派息唔會差。
莎莎噚日升7.3%，收2.925元，成交股數254萬股，金額731萬元。
慕容小初