馮仁昭四圍超：
華仔個唱超額搶飛老竇冇情講

歌神許冠傑復出舉行演唱會，場數一加再加，氣勢一時無兩，劉德華九月初亦要開十場個唱，啲飛都去得好快，亦開始出現搶飛情況。雖然唱片業仍一池死水，但演唱會市道已復甦。

電話不勝負荷
華仔今次個唱搵咗東亞銀行贊助，早幾日換飛活動大排長龍，噚日銀行開始接受信用卡客戶訂飛，發言人話已經開多三十條電話線，點知都頂唔住連訂飛系統都down埋，要搶修三個鐘先搞掂，結果賣飛時間只剩番半日，但留畀客戶電話訂飛嘅門票已經賣咗九成。銀行方面梗係想攞多啲飛畀客戶訂購，但主辦單位都好頭痕，皆因華仔公司同歌迷會嘅內部認購已嚴重超額。
華仔目前正身在北京拍戲，佢話：「公司已經研究緊撥多啲飛畀預訂嗰邊，買唔到咪等七月九號出街排隊買囉。我老竇幫啲親戚朋友訂咗啲飛都好似話要cut呀，我都唔知點算，加唔加場等我拍完戲先傾啦。」

曾華倩低胸花裙響頭炮
曾華倩同李力持今個月二十八號開始會喺香港電台主持節目《你真超人》，佢兩個噚日都好花心思打扮出席記者會，曾華倩重着咗一件低胸花裙，相當養眼，近年佢都好少咁性感，睇嚟真係好重視呢個節目喎。
另外，喺記者會上鄭希怡送上糖水同湯水畀曾華倩同李力持兩位主持人潤喉，而李克勤重頒贈兩張主持人智能身份證畀佢哋㖭。

無綫怕混淆唔借宣傳片
有傳政府早排為咗宣傳「技能提升計劃影視課程」向無綫借片，但無綫就諸多推搪。噚日馮仁昭同無綫高層樂易玲傾開呢單嘢，佢話政府想借嗰段係無綫自己台號嘅宣傳片，佢哋擔心用嚟做課程宣傳會令觀眾混淆，所以建議政府借過第二啲片段，但對方冇回覆，絕對唔係無綫唔肯幫忙。

黃玉郎二千萬拍《大聖王》
玉皇朝出版集團創辦人黃玉郎，噚日喺灣仔公布同上海文廣新聞傳媒集團副總裁楊荇農嘅合作大計，並斥資二千萬將漫畫《大聖王》製成動畫，黃玉郎話：「套動畫大約○六年先可以完成。」至於佢有份投資嘅新片《神兵》已經搵咗程小東做導演，重會搵謝霆鋒演出。