講起沙士，好多人都諗起九龍灣淘大花園，美聯楊伯強做咗個統計，由去年五月，淘大二手最黑暗時候，成個月得五宗成交，呎價跌到八月份最低，唔到千七，認真慘情。
不過，凡事都會否極泰來，今年初樓市大旺，炒味濃烈，淘大個市都有番起色，除咗商場人流同沙士前相差無幾外，樓價都上番唔少，𠵱家呎價去到近二千三，雖然比上個月落番啲，但比去年谷底上升三分一。今年交投以三月最旺，共四十六宗。
淘大重災區E座，現價都二千，同市價差距已經拉近好多。
紅磡黃埔花園今個月只有十三宗成交，比上個月少咗一半，預計全月唔超過二十宗，比去年沙士期間重要少。
中原曾偉堯話，個市咁靜，主要係業主過份心雄，叫價太硬，甚至反價唔賣。好似啱啱有一單，買家睇中二期六座五五八呎單位，不過，業主三度反價，由最初口頭協議百九萬成交，反價到最後叫二百二萬。買家認為價錢唔合理，退而求其次，以百七萬轉買另一個四六九呎單位。
好彩買家有心入市，情有獨鍾黃埔，否則業主咁搞法，隨時趕走客人拖冧市。
美聯美善會，不時舉辦慈善活動，希望員工除咗砌單，多啲關心社會、回饋社會。為咗響應十月十四號世界視覺日，美善會為奧比斯進行慈善籌款，即日開始，為期四個月籌款，不過籌款箱暫時只會擺喺寫字樓。
除咗籌款，美善會每個月都搞慈善活動，好似一月份，為聖雅各福群會舉辦電器回收，二月份又探訪幼稚園，兼舉辦新春聯歡會，而十一月，就計劃幫健康快車籌款。總之活動多籮籮，鞏固美記形象。
旺角小食檔舖位創新高成交價，舖位市況突然又再人氣大旺。
利嘉閣統計過，第二季截至6月20號，有近百三宗確認人店舖成交，比首季多一半，帳面有錢賺嘅重超過六成。
有高手連坪洲舖都炒到有錢賺，買入價係十一萬五及十二萬三，七周後摸出，各以二十四萬四摸出。
離島地舖都可以個零月炒到有二十五萬落袋，都咪話唔服。
利嘉閣重話，其實二線地區摸貨舖成交，都佔近八十宗，比核心零售區五十零宗重要多。
中原一姐劉瑛琳，噚日搞新書義賣酒會，可能代理近年與發展商關係日見密切，所以唔少發展商捧場。不過，最早到竟然係股壇名嘴陸叔陳永陸，佢同中記工商舖部員工談得好投契，又分析舖租上升對零售股影響，唔知中記員工攞到幾多投資貼士呢？
發展商最早到係新地蘇仲強，其他到場重有永泰李簡鳳玲，及信和楊文伉儷等一大班。幫一姐印書嘅資深報人陸錦榮都有出席。
酒會地點係尖沙嘴順豐大廈地下，原來一姐同呢間舖負責人識咗好耐。
蘭西
電郵地址：
