參加七一大遊行唔使講理由原因，不過假如中央政策組又試做「失實民調」，市民就要暢所欲言，別吞吞吐吐，被政府假民調之名，扭曲堆砌，死無對證。
七一上街，各有需要，理由多多，綜合起來，有下列各項：
一、遊行好過去插針難下的海灘，一來不怕皮膚癌，二來當做焗桑拿，不費分文，瘦身纖體。
二、慶回歸成日流流長，唔知做乜，又無慶祝派對可去，遊行能治療假日自閉憂鬱症。
三、遊行不斷叫口號，可以練聲練氣，於丹田有益，靈過食中藥進補。
四、自己叫老董下台太孤單，遊行一呼百應，知音就在你左右，Stereo效果，氣氛一流。
五、遊行時爭取被記者攝入鏡頭，好讓親戚朋友知道，雖然07/08無普選，自己並無採取「譚惠珠方案」燒炭，仍生勾勾企硬。親友唔該慳番帛金。
六、去年七一，五十萬人蒲頭，嚇窒中央，即刻開大水喉擲錢救港。今年窮鬼冇少到，等住要中央打救，七一是向北京老母一再展示褲穿窿的良機。還我money啦，冇銀用邊有心情溝通？
七、估計的三十萬人當中，考自己眼力，玩捉鬼遊戲，睇吓邊個是中方特務、便裝公安、「陳壽山」，甚至專襲擊議員辦事處的「潑糞屎棍」。
最後，七點一個上街的理由是：大家心知肚明，哦。