中方《中國日報》帶頭一開炮，八方一早批死，特區政府「投資推廣署署長」盧維思條命就凍過水。立法會維港匯報告一出，親中民主派大聯手，一齊力竭聲嘶，要將盧維思炒魷正法。
喺親中左共嗰一方，既然主人曾慶紅都話咗「同民主派沒有矛盾」，咁最近三個月不斷一輪謾罵，可惜「港獨」劉慧卿不受拘捕，「漢奸」李柱銘又不必受國法制裁，陳方安生又不必遭到掌嘴私刑，真係好易谷到癲。啱啱有個盧維思撞埋來，左共又點會放過，於是仰天一聲長長嘅嘶叫，聲稱要「處理」盧維思，重話誓要割下盧維思嘅人頭來祭酒㖭。
盧維思冇錯係一炮就打散咗一億，不過，若果要論罪，佢係咪第一個應該炒呢？睇吓紀錄：
沙士大瘟疫，三百條人命蒸發，因為衞生福利及食物局局長楊永強一句「不會在社區爆發」，冇及早隔離威院及淘大花園，搞到特區變為瘟疫港，全球神憎鬼厭，人人掩鼻彈開，經濟總損失保守估計超過五百億，點解冇人要「處理」？
若然要計數，高科技港、中藥中心、鮮花轉運港、母語教育呀咁、香港房地產及港人資產蒸發咗成三萬億，點解竟然又冇人要受到處理？
盧維思只不過係中間人，佢嘅職責係「投資推廣署」，本來負責周遊列國，到處拉集資金來投資，唔係專業娛樂事業經紀，專搞歌星大騷。財政司司長整咗個「振興經濟活力小組」，拍心口撥款十四億，話到明可以大花筒亂使，重分一億質畀盧維思叫佢搞掂。咁阿米老鼠自己又唔識流行音樂，咪戇居居畀咗美商會親中挺董鬼佬詹康信去搞，老詹請咗隊滾石，於是就滾咗一億走咯。
追究責任，上有邊個指派盧維思去搞維港騷，呢個人有眼無珠，第一要處分；下有詹康信點紅點綠，請咗隊滾石嚟搵食，亦一樣係點紅點綠。一上一下呢兩個都應該打靶，居然冇事，中間嘅盧維思，反為就要斬首，點解？
盧維思抵唔抵炒？抵炒。咁財政司司長唐英年係咪更加要炒？點解唐唐唔使炒，因為佢傳聞係第三屆特首。詹康信係咪更要炒？又唔使炒，因為佢挺董兼親中，炒埋佢，親中陣營拉車邊少咗個鬼佬，價錢亦Cheap多兩蚊。
可憐盧維思誤入「中國籍」，以為做咗「中國人」就冇事，點知佢係土共痛恨嘅當奴隻頭馬，冇人照住，中方照樣炮轟。中國人入美英籍，多過老鼠，不過第日若然想打鑼搵番個鬼佬入中國籍，真係難過登天咯。
一炮冇咗一億，又唔使驚喎。啲米積架等成班美英歌手，見到「中國人民當家作主，維港任㩒任劏通地水魚」，佢哋喺香港狠狠重刮一筆，對於中國人，一定會感恩，返到美英祖家，一定會幫襯多兩餐唐人餐館，食咕嚕肉、𡁻牛肉雜碎，咁啲錢兜個轉，咪又回籠番我哋海外炎黃子孫個袋？睇開啲喇。
傳真︰2623-9278
電郵︰