Roadshow女主持梁慧嘉（Viann）近日殺入樂壇，大唱校園歌曲。Viann為以最佳狀態示人，她每日游泳及吃營養餐，成功減去十四磅肥肉。
梁慧嘉除為Roadshow擔任主持外，亦曾參演多部電影包括《黑白森林》、《心寒》及《重案黐孖Gun》等，但近日她卻大唱校園歌殺入樂壇，單挑唱校園歌而揚名的女子組合at17，而其新碟亦已於日前推出。
Viann身形向來較為圓潤，為以最佳狀態示人，她便勤游水及吃營養餐減肥，經過連月來努力，終減去十四磅肥肉，其三圍現為33、23、35。Viann日前便相約之前與她一同拍MV的幾位小朋友，到黃金海岸曬太陽，大夥兒更跑到沙灘嬉水及砌沙堆。
對於要減肥做歌手，Viann說：「我覺得冇乜慘唔慘嘅，食得鹹魚抵得渴，𠵱家又興瘦，我諗自己除咗扣喉之外，所有減肥嘅方法都試過。讀書嗰陣時，我最肥去到一百四十磅，入行之後就瘦番啲。」
至於為何要選擇唱校園歌，Viann說：「呢行有咁多人，sell青春唔到我，sell性感我又冇身材，自己又唔係特別唱得勁。喺呢個年代，有幾十萬就可以出碟，喺一般人心目中，Viann係Roadshow儍大姐，咁就倒不如當係踏腳石，唱吓校園歌。」
由於這次出碟屬小試牛刀，碟內僅收錄了三首歌，問Viann會否角逐樂壇頒獎禮的新人獎？她說：「唔會啦，我都冇簽唱片公司，今次係學聯國際教育機構搵我唱校園歌，我諗自己會到明年至正式出碟。」
採訪：朱倬誼 攝影：何國豪
髮型：PaulHui（TripleEdge）
