李克勤昨日出席港台記者會時，對吳浩康涉嫌藏毒被捕一事，深感惋惜，他說：「或者我會叫明星足球隊多啲踢人入會，等班年輕人多啲去做運動，不過個時代唔同咗，有啲嘢好難講。但係八十年代時都知道毒品會同做音樂嘅人扯上關係，但係我都冇俾人引誘過，我以前試過入一間錄音室好勁大麻味，要即刻走番出嚟，真係聞到都會high。同埋我呢排睇到周永恆嘅新聞都覺得佢好後悔，總之希望佢哋經一事長一智，每個人都會有錯誤。」
此外，女子組合Cookies成員Stephy和Theresa昨與鄭融及董敏莉在數碼港，出席一化妝品牌宣傳活動。對於吳浩康涉藏毒一事，Stephy說：「之前拍電影《失驚無神》合作過，但私底下冇通訊，不過覺得佢個人好健康，成日講工作。我對於佢件事就唔係咁清楚，而自己細個都俾人引誘過食煙，但好彩忍到。」Theresa則說：「自己唔清楚件事，所以唔方便講嘢，毒品唔健康，自己一定唔會接觸。」