七月一日快到，上街遊行究竟會有幾多人呢？大家一味靠估，唔知邊個真。中文大學做調查，就估有三十萬人，信不信由你。
成班舊年上過街嘅老友，今年會唔會再去呢？近日觀察，情況好似冇去年咁一面倒，開始有人搵藉口唔去，更多人趁住七月一日假期係星期四，告一日假（星期五），就可以在星期三黃昏上機去東南亞，四、五、六、日四天假期去享受陽光與海灘，幾爽。如此一來，今年七月一日應該冇舊年咁熱鬧，不過有三十萬人嘅話，老董都唔慌會高興。
六月二十日馬季煞科，惡佬明入場搏殺，碰到幾個判頭，講馬之餘，話題亦扯上七一、九月選舉，一位判頭與祖國背景公司有來往，佢話：「祖國公司啲老友呢輪話避免麻煩，叫我哋唔好與佢哋講七一，而且公司已經開始進行教育，教佢哋認識甚麼是還政於民︱︱建聯，向佢哋講：你住喺邊個選區呀？選區內有邊個民建聯候選人呀，投票要以大局為重，務實穩定、建設經濟呀！一言以蔽之，就係公司接到任務，全力發動公司員工支持民建聯。」
有大公司支持，都未必可以贏嘅，最緊要係不記名投票，在不受影響嘅現場環境下投票。九月選舉，假如民建聯表現可人，各位在中資公司打工嘅老友，不妨返公司邀功，大大聲話，我聽公司話，投票畀民建聯呀！但如果民主派大勝呢？都一於領功，鬧一鬧香港反動派何其多也。大家都係做戲啫，上頭叫你投票畀某某人嗰陣，佢自己都係交功課之嘛。