好多人睇淡之時，個市升到出乎意料之外。恒指彈升313點，啲Call輪七彩，升幅超過50%嘅，竟然有17隻。噚日略為提吓嘅人保非標準輪9050，成交金額3萬銀咁大把，一升就係68%，喺龍虎榜上都只能排第8。前日推介嘅長實Call輪9973，升26%，連頭50名都入唔到。
啲Call輪升得太勁，要買貨，需要膽量。倒不如搵啲落後嘢瞄瞄。聯通（762）威盡恒指成份股，高收6.25元，升7.8%，而中移動（941）亦都唔失禮，收23.25元全日最高，升4.3%。睇嚟啲錢再度流入電訊股。唔嫌高價，可追中移動Call輪9824同9813。至於聯通Call輪，則冇邊幾隻追得落手，9844溢價18.3%過高。
電盈（008）升得5仙，收5.50元，值得追落後，買輪，揀鎖定回報輪9762，10月到期，輪價21仙，表面負溢價1.6%，表面槓桿率26.2倍。上網睇發行商網站資料，實際溢價6%，有效槓桿率5.7倍，呢組數字，算係咁，早前最高價27仙，隨時上破。
中銀（2388）忽然大發神威，收12.85元，升4.9%，跑贏恒指好多。滙控（005）收116.50元，升2元，又係有機會追番上中銀嘅升幅。大市氣氛轉佳，滙控唔會立地成佛，揀滙控Call輪炒，9783諗得過，9月尾到期，輪價77仙，溢價1.0%，槓桿率15.1倍。有3個月時間，幾乎平水，槓桿率咁大，夠晒爆炸力。
章盛