內地歌迷出晒名熱情，每次有乜嘢紅人歌星返去搞簽名會同做騷，就梗係被包圍擁抱，台灣男歌手王力宏亦唔例外，佢日前啱啱去上海演出，有一個環節邀請歌迷同偶像握手見面，點知一位着粉紅色衫嘅妙齡女fans，竟然喺台上飛擒大咬，抱住王力宏唔肯放手，搞到王力宏幾尷尬。不過，馮仁昭始終覺得男歌手俾女歌迷攬，總好過好似栢芝同王菲等女歌手俾男歌迷攬，起碼男仔有能力保護自己吖！
王力宏每次返國內演出，觀眾都好鍾意聽佢唱嗰首《龍的傳人》，原來佢自己都好鍾意呢首歌，王力宏重用國語話：「這是我非常驕傲的一首歌，我小時候常常聽到的一首歌就是《龍的傳人》，它彷彿跟我有着一種很神奇的緣份。」
此外，王力宏又用二胡演繹一曲《在那遙遠的地方》，佢又話：「這是我首次在公開場合拉二胡，這首歌經過重新編曲，我很喜歡，還準備收錄在下一張專輯中。」
張玉珊噚日喺中環公布「修身堂」業績，順便幫佢最近聘請拍廣告嘅俊男美女解畫，咁多女仔就梗係有是非傳出，有人話張燊悅恃住自己係舊人扮阿姐，張玉珊就解釋話：「佢嘅態度比我想像中好，可能佢是非命。」另外，李蘢怡又俾人話佢對住吳彥祖「猴擒」，張玉珊則話：「無，佢都無投懷送抱，如果可以我自己飛身去。」
鄭中基前晚同森美到商台做節目嘉賓，鄭中基近日因為宣傳電影《我要做Model》同埋趕拍新片《追擊八月十五》連續捱咗幾晚通宵，以致聲沙。楊千嬅係枇杷膏代言人，問鄭中基會唔會問千嬅攞產品潤喉，佢話：「我唔飲得，飲咗會封喉，我只可以飲鹹柑桔，屋企有啲陳年鹹柑桔。」
Shine嘅徐天佑同黃又南噚日到電台出席董敏莉告別電台節目嘅派對，席間天佑食咗一舊搽咗芥辣嘅海膽壽司，食完之後佢即刻露出咗好痛苦嘅表情，原來天佑早排曾經喺台灣玩遊戲節目時食芥辣食到暈倒，結果要好兄弟又南扶住佢，難怪佢食咗嚿咁正嘅海膽壽司會咁嘅面口啦！
陳小春噚日喺新城娛樂台接受節目訪問，佢提到日前喺蘇州表演，有女歌迷投懷送抱，小春話好冧，重話：「國內歌迷好熱情，周不時攬攬錫錫，睇自己點擋啫！不過我會順勢退一步，錫嘴變錫面，我係君子，嗰啲係小人行為，大庭廣眾點會咁做。」小春重話下月自己生日，到時會開派對大事慶祝㖭。
無綫長者節目《開心老友記》3周年，噚日就請咗幾個資深藝人曹達華、羅蘭、梁舜燕一齊慶祝，幾位老人家就即時分享保健心得，梁舜燕話：「想減少眼部皺紋，就可以用雞蛋殼入面層衣敷面，好有效，煮餸用剩啲蛋殼就可以用，幾慳！」
