國家副主席曾慶紅，喺北非隔洋發出微笑軟功，呼籲港人冇錯可以示威遊行表達民主要求，不過同時希望團結、穩定，千祈唔好分化，又話同民主派冇矛盾同衝突。
曾副主嘅言論啱唔啱聽？啱聽。不過，佢老人家又知唔知，香港如果可以維持到團結、穩定，利用到優勢，去年七一，又點會有五十萬人大遊行？
維護團結同穩定，主要責任在特區政府。第一，若然政府一早肯順應民意，用白紙草案深入諮詢民意，唔好咁草率通過廿三條，又點會搞出一鑊反廿三條嘅大遊行，社會大分化？
第二，若然特區政府周圍嘅工商界，唔係咁自私自利，個個踴躍響應一九九七年施政報告所講嘅「高科技中心」偉大藍圖，善用八間大學每年畢業嘅人力新資源，率先投資高科技工業，而唔係死攬實最易刮水嘅地產唔放手，經濟轉型一早經已開始，話唔定，冇浪費到呢七年，經濟轉型一早已經成功，現時開始有MadeinHongKong嘅電腦IT軟件向全球出口㖭。
第三，有財有勢嘅工商領袖如曾憲梓、陳啟宗、胡應湘等，若然肯積吓口德，唔好開口埋口就大罵港人想普選係搞「港獨」，唔鍾意嘅可以離開，兼而且自己帶頭投多啲資，同香港製造多啲就業機會，咁香港嘅打工仔，又點會唔願意同工商界大團結？
維護團結同穩定，責任首先在有權、有財、有勢嘅特區政府同工商界。港人其實唔怕官商勾結，以前殖民地政府，何嘗冇，但只要勾結得嚟，市民均衡得益，而唔係政府俾一班自私貪心嘅地產商，頻頻過幾戙，佢哋自己有權、有財、有勢，踩住呢個政府嘅龜背過河，過咗河，或過到一半，龜背翻沉，自己跌咗落水，就惱羞成怒，大罵阿董係「三零部隊」。
六百萬市民除咗手上擁有選票，以及擁有一對無力移民、但重可以遊行嘅兩腿，真正係無權、無財、無勢，同老董比，係真正嘅「三零部隊」。冇權普選，有權納稅，憑六百萬市民：的士小巴司機、清潔工人、文員、教師、會計師……邊個有力量危害團結、破壞穩定，兼分裂搞「港獨」？
去年七一大遊行，就係民憤大爆發，忍無可忍，全靠五十萬人大遊行，先至昭顯港人正義感嘅大團結，遊行之後，怒氣宣洩，社會先至重歸穩定，大陸政府先至會重新揼水自由行，曾副主席如果係治國人才，冇理由連呢一點基本嘅因果邏輯都分唔清。香港人良心未泯，正義感未死，我哋重係堅持食用真嘅食品，拒絕大頭奶粉、紅泥花生；重係堅持講真心說話，拒絕種種抹黑謾罵嘅謊言，重係追求真理，拒絕接受指鹿為馬嘅詭辯，呢啲就係香港嘅優勢，香港人相信，呢個優勢，有朝一日，全國十三億人都可以共享。
傳真︰2623-9278
電郵︰