呢期個個興玩封盤，好似土瓜灣傲雲峰，唔夠一個禮拜兩度封封解解。
上個周日晚，發展商長實公告封盤，但係，唔使二十四小時，星期一晚就解封迎端午，節後再封。到咗噚日，長實梁焯鏗又話，周末之前有公布，最快周六又有得賣嘞。
蘭西記得，最初發展商發明呢招，一聲話封，買家都不知幾咁緊張，嗱嗱聲扲錢話買。今時今日，封盤好似飲餐茶咁隨便，睇嚟真係唔使急。
最近開賣嘅馬灣珀麗灣三期，與屯門聚康山莊，都係封嗰幾日就解，唔通真係潮流興？
重有噃，傲雲峰封盤期間，長實好賣力宣傳；解封又出優惠，送馬鞍山海澄軒月租套房住宿，名額十個。另有業主推薦計劃，推介親友買佢，送超市禮券。同時市傳長實跟財務機構合作，七成按揭及兩成半二按，都係全期P減兩厘七。
中原集團文化風氣盛，繼董事總經理黃偉雄，同董事劉瑛琳相繼出書後，集團內部員工又幫主席施永青出番本書，取名《政經敢言》，呢本書係從施永青網頁專欄「老施周記」五百幾篇文章中，選出五十篇，結集成書。
書分七章節，包括中港經濟融合、香港經濟政策及香港地產政策等，共三萬幾字。書印八千本，每位員工派一本，其餘公開發售，每本五十蚊。聽講，全書冇廣告，有國際編碼，可於世界各地圖書館，經電腦系統即時查閱。中原遲啲會印五千本簡體版，送畀內地員工。
施老闆被問到本書時，佢唔係好贊成出書，但集團政策係「無為而治」，咪由得啲同事搞，但製作過程完全冇參與，自己都冇睇過本書。佢話遲啲有時間，可能會出番本自選集，到時所有文章都係由自己揀選。
近月樓市淡靜，成交價較參差，部份業主低價沽貨。
中原林龍南話，北角城市花園二座低層B室，業主五月連約放售，叫價三百四萬，冇人吼，惟有接受較大幅度議價，終以三百一萬成交，低市價八個巴仙。佢要蝕一成八。
另外，利嘉閣林逸明話，上水龍豐花園B座中層三室，六百五方呎，以近百五萬易手，低市價七個巴仙，勁蝕四成一。
西九龍文娛藝術區項目，上周六截標，個別發展商即日公開建議書部份內容。不過，傳媒對入標詳情重好有興趣。
信和余惠偉，噚日出席豪宅租盤記者會，就畀記者捉住問西九龍項目進展。
佢早有準備，巧妙迴避投資額呢類敏感問題；相反，對於設施就講得相當詳盡，連個天幕底部嘅清潔保養方法都講埋，搵機械人抹玻璃喎，都幾新鮮。
過去一年香港樓價急升人所皆知，網站researchworldwide.com指出，截至四月，香港住宅價格年升幅為二十七個巴仙，榮登全球城市榜首，又多一項世界紀錄，相信唔係咁多人估到。南非以少少落後，升二十四巴仙，居亞軍，英國第三。
蘭西與業內人士講起，唔係太多人對呢個網站有印象，睇真佢份報告都幾奇怪，唔同地方用唔同時期比較，例如香港同美國截至四月，意大利同加拿大可以截至去年第四季，相差一季有多，咁樣都可以比較，真係新聞。
蘭西
電郵地址：
