港股在窄幅內爭持，連續3個交易日，恒指都在11780水平之上獲得支持而反彈，噚日收11849，升4點，期指則低水11點。
港股短期走勢轉穩，且亦出現較為敏感的入貨訊號，但未能發力，相信係同期指有關。期指下周二結算，未來兩個交易日係轉倉高峯期，好淡會有一番拉鋸，結算過後，形勢才會明朗化。
今次調整，由高位12539掉頭一支大陰燭直插落嚟，暫時到11780水平才停步，跌幅比預期為深，恒指已跌穿3條平均線，且10日線（12108）亦將跌穿20日線（12100），走勢有進一步轉壞可能，目前好友最後防線係島形上升裂口底部的11700，若能守穩後再現升勢，重上3線之上（其實講緊只係二三百點），形勢將會轉危為安。噚日升降指數繼續轉好，希望能為大市帶來支持。
國企表現較強，國指收3975，升51點，石化股同資源股都見有大盤收集，其中以重鋼（1053）升7%、北京燕化（325）升5.9%同江西銅（358）升5%較突出。除呢兩大類外，噚日國企嘅焦點自非有外資入股傳聞的哈爾濱動力（1133）莫屬，股價一度升上2.075元，尾市回收1.94元，仍大升19%，水漲船高，東方電機（1072）亦有6.3%進帳。
前有哈啤（249），家吓有哈動，莫非哈爾濱風水特別好？消息指哈動正同美國通用電氣、法國工程集團ALSTOM同日本三菱重工傾緊入股事宜，會否演變成好似哈啤嘅爭奪戰，冇得估，但以哈動往績PE45倍、預測PE20多倍計，收購有機會令股價重上2元水平，對小股東係好事。
冠捷科技（903）宣布今年首季業績，營業額8.9億美元，升124%，獲利3387萬美元，升135%，每股盈利2.49美仙；去年集團營業額21.35億美元，今年目標係29億美元。去年上半年，集團獲利3009萬美元，今年首季已超出此數，業績遠比市場預期為佳。
冠捷已調升今年的付運量，液晶顯示器由800萬台增至1000萬台，CRT由1000萬台增至1200萬台，以此推算，04年（12月年結）盈利可調升至1.1億美元，每股盈利8.1美仙（折63港仙），10倍PE計，股價可見6.3元。
郭兆誠