童星出身嘅美國女演員瑪莉姬蒂奧遜（Mary-KateOlsen），啱啱喺上個星期日同埋孖生姊姊艾絲莉奧遜（AshleyOlsen）過咗十八歲生日，佢哋事前曾經揚言會大事慶祝，不過喺生日前夕突然取消咗慶祝活動，原來瑪莉姬蒂因為患上厭食症而入咗廠，現時正接受治療。
以前珠圓玉潤嘅瑪莉姬蒂，近排出席公開活動嗰陣，一次瘦過一次，佢喺四月尾去荷李活為名人之星揭幕嗰陣，我羅拉已經發覺佢瘦到皮包骨咁，個樣真係有啲嚇人。據美國《Us》雜誌爆料，原來瑪莉姬蒂已經被證實患上厭食症，佢哋嘅發言人重同傳媒講：「瑪莉姬蒂啱啱入咗一個治療中心，搵醫護人員幫佢解決一個健康問題。」
其實由九個月大已經開始做電視節目賺錢嘅奧遜姊妹，除咗做電視外，重撈埋電影，而佢哋名下嘅時裝品牌又喺全美大賣，佢兩姊妹嘅身家已經係億億聲，壓力大就唔在講啦，而瑪莉姬蒂為咗保持苗條身段，成日都唔肯食嘢，終於咪搞出事囉。聽講遲啲艾絲莉去澳紐宣傳電影嗰陣，瑪莉姬蒂都唔會去，佢除咗想專心養病之外，最主要都係想避開傳媒啫！