鄭大班往曼谷度周末，原來不止佢一家人，重有成二十人一齊去。曼谷價廉物美，樣樣便宜過人，大班等人在半島酒店包廳為議員R祝壽，畀議員R一個極大驚喜，大家玩得好高興。半島酒店送酒送花，每人一個大餐（五道菜），極為精美，只收每位一千二百銖（港幣二百四十元），真係抵到爛，香港邊度有得比。
不過最遺憾者，喺曼谷好難搵到一隊菲律賓人樂隊現場助興，半島嘅知客搵唔到，出動運通黑金卡亦都無功而還，若果話曼谷夜生活有缺點者，此乃一項。照計菲律賓與泰國同為東盟國家，泰國放鬆一啲工作限制，讓菲律賓樂師入境，唔應該係難事啫。
鄭大班此行碰到一位看相異人，佢一講個名，左丁山就記得佢咯。呢位異人三個星期前在曼谷見到Y律師，佢話：「三個禮拜後再見！」Y律師覺得好奇，立即反駁：「唓，我做乜咁快又再嚟過？」點知呢次成班人話去曼谷度周末，Y律師見有伴，好好玩，於是又去過，中正異人嘅預言。呢位異人係華人，今留在泰國長搵長有，皆因唔少達官貴人都好鍾意聽異人嘅意見，趨吉避凶也。
記得一九九五年，左丁山與Y律師去到曼谷，與異人一齊吃飯，異人望咗左丁山兩次，就話：「你返到香港就暫時冇得撈咯，你會辭職先，再搵過！」左丁山為之大吃一驚，因為當時諗住辭工，心情甚悶，故此與Y律師去曼谷度周末，減吓壓，估唔到一下就俾異人篤穿心事。世界之大，無奇不有，如看相異人者，罕見之至。