西九龍文娛藝術區項目喺上個星期六截標後，入咗標嘅發展商已開始明爭暗鬥，信和同九倉牽頭財團率先公布建議書內容，四叔李兆基旗下嘅恒基地產亦唔執輸，至於超級組合長實同新地，就話會畀啲時間政府睇，適當時間才向外公布。
無入標嘅恒隆地產主席陳啟宗，亦有嘢講，話九十年代開始已同下屬講，除咗鐵路沿線項目外，唔會參與政府有份嘅項目，因為「見過鬼所以怕黑」。佢重話，「其他唔好講，淨係九龍站上蓋為咗『君臨天下』個名，足足申請咗十八個月」，其他嘅有幾麻煩，看官自己諗諗。
陳啟宗成日鬧政府可能都有啲用，老董最近係fit咗少少，好似前日去香港仔微服出巡，本來預佢喺石排灣邨下面行吓，點知佢一馬當先走上百幾級樓梯，氣都唔使點唞，陪佢出巡嘅蔡瑩璧等都自愧不如。
講開蔡處長，佢噚日出席東華三院午餐會時爆料，話自己舊年發燒，驚係沙士，所以冇出席，今年冇事，梗係要嚟捧場啦。
（圖）蔡處長（左）同東院新主席陳耀莊伉儷合照。
傳真︰2623-9278
電郵︰