民企股噚日普遍反彈，其中由6元樓上一路沽到落5元樓下嘅大成生化（809）表現搶鏡，好似鯉魚大翻身，勁升11.8%，收5.20元，成交股數1604萬股，金額7781萬元。
不過，另一隻向來受注目嘅超大現代（682），股價就仍然唔係咁好睇，噚日再跌2.3%，收2.15元。經紀黃話，超大早排發債券，好似呢兩日就知道反應。至於另一隻民企股恒安國際（1044），噚日在美資大行力推下，股價升4.85%，收4.325元。
經紀黃話，恒安向來以生產女性衛生用品聞名，但家陣隻股嘅賣點，反而係舊年同大股東購入嘅紙巾業務。據分析員話，恒安喺大陸賣既高檔紙巾，銷情同外國品牌有得揮。另外，佢哋嘅嬰兒紙尿片業務，亦錄得唔錯增長，反而女性衛生用品業務增長，就有放緩迹象。
恒安向來成交唔多，始終係一個令人唔放心捧場嘅原因，但隻股由5.70元高位，沽到落𠵱家水平，累積跌幅唔算小，加上有外資行力撐，小注玩吓都無妨。
慕容小初