荷李活影星班亞弗力（BenAffleck），雖然最近喺工作上表現唔多理想，幾部主演嘅電影都票房失利，愛情運又唔係咁好，不過事業同愛情皆失意嘅佢，居然喺賭枱上重振雄風，喺一個啤牌大賽上，擊敗蜘蛛仔杜比麥奎爾（TobeyMaguire）等九十個對手成為啤王。
一向有鋪賭癮嘅班仔，上年同籮霸珍妮花洛庇絲（JenniferLopez）拍拖嗰陣，成日俾籮霸管住晒，班仔去年參加過一個啤牌比賽，一早就被踢出局。不過，班仔經過一年嚟嘅苦練，佢嘅牌技進步神速。
前幾日班仔再次參加加州商業俱樂部啤牌大賽，可能係因為籮霸離開之後，手風即刻順晒，佢一連擊敗咗包括蜘蛛仔杜比麥奎爾在內嘅九十位對手，成為啤王，重賺到成三十五萬六千四百美元，即係差唔多二百八十萬港紙，相當厲害。被指牌技好過演技嘅班仔，今次亦順利取得明年四月舉行嘅世界啤牌巡迴錦標賽嘅參賽資格，到時可以同世界各地嘅啤王一較高下。
我羅拉估唔到喺螢幕上飛天遁地無所不能嘅蜘蛛仔杜比麥奎爾會咁水皮，佢一上啤枱三兩下就被人淘汰。但係我就更加估唔到班仔今次會咁犀利囉，唔通真係情場失意，賭場得意？